Қазақ геологиялық барлауының негізін қалаушылардың бірі, қазіргі Энергетика министрі Болат Ақшолақовтың әкесі Орал Ақшолақов 87 жасында өмірден өтті, деп хабарлайды Almaty-akshamy.kz.
Орал Ақшолақов - 170-тен астам ғылыми қолжазбаның, сондай-ақ Қазақстан мұнай энциклопедиясының екі басылымының авторы. Сонымен қатар, Прорва, Мартыши, Қамыштытовы, Жаңажол, Жетібай, Өзен, Тасболат, Кеңқияқ, Өріктау, Қарашығанақ және т.б. бірқатар мұнай-газ кен орындарын ашқан ғалым.
Орал Ақшолақұлы Ақшолақов 1936 жылы 16 маусымда Атырау қаласында дүниеге келген. 1958 жылы Губкин атындағы Мәскеу мұнай институтын геолог мамандығы бойынша бітірген.
1976 жылы «Каспий ойпатының оңтүстік бөлігіндегі мұнай-газ кен орындарының геологиялық құрылымы мен орналасуының ерекшеліктері» тақырыбында кандидаттық диссертациясын қорғады.
Еңбек жолын 1958 жылы Батыс Қазақстан геологиялық басқармасы мен Гурьев кешенді аумақтық мұнай және газ барлау экспедициясының коллекторы болып бастады. Бірнеше жыл геологиялық экспедицияларда жұмыс істеді.
1992-1994 жылдары - Қазақстан Геология және жер қойнауын қорғау министрлігінің бас мұнай-газ басқармасының бастығы. 1994 жылдан 1998 жылға дейін «ҚазМемлекеттік» РМК минералдық ресурстар бас басқармасы бастығының орынбасары болды. Одан кейін бірнеше жыл «Степной Леопард» бірлескен кәсіпорнының бас директоры, «Тау-кен және экономикалық консалтинг» ЖШС бас маманы қызметтерін атқарды.
2003 жылдан бастап Марабаев атындағы «Мұнайшы» қоғамдық қорының құрылтайшысы және Қамқоршылық кеңесінің мүшесі болды.
