Қаламызда «Автобус» жедел алдын алу іс-шарасы жүріп жатыр
13 қазанға дейін жалғасатын шара барысында 184 патрульдік экипаж және 911 полиция қызметкері жолаушылар көлігін тексеретін болады.
Шара басталған күні 46 әкімшілік құқық бұзушылық анықталды, деп хабарлайды Almaty-akshamy.kz Алматы қаласының полиция департаментіне сілтеме жасап.
«Бұл шара жолаушылар тасымалдайтын қоғамдық көлік жүргізушілерінің жол қозғалысы ережелерін бұзуын анықтау мен жолын кесуге, сондай-ақ автобустардың техникалық жағдайын тексеруге бағытталған. Шараның мақсаты - жүргізушілердің көліктік тәртібін жақсарту, техникалық ақауы бар немесе қайта жабдықталған жолаушылар көлігінің қолданыста жүру фактілерін анықтау және заңсыз жолаушылар тасымалының жолын кесу», - дейді, жергілікті полиция қызметі басқармасының бастығы Манап Саттаров.
Іс-шараның бірінші күнінде 46 әкімшілік құқық бұзушылық анықталды. 29 жүргізушіге ҚР ӘҚбК-нің 595-бабы (маневр жасау ережелерін бұзу), 12-сіне ҚР ӘҚбК-нің 591-бабы (көлік жүргізу кезінде телефонды пайдаланған) бойынша хаттама толтырылды . Мамандандырылған айыппұл тұрағына 1 қоғамдық көлік орналастырылды. Рұқсат етілмеген 6 қоғамдық көлік пен такси аялдамасы жойылды.
