«Жеңіс» акциясы: 2014 жылдан бері соғыс және тыл ардагерлері пойызбен тегін жүреді
Қазақстандағы барлық соғыс ардагері мен тыл еңбеккері ҚТЖ пойыздарында тегін жүре алады.
Мұндай акцияны «Жеңіс» бастамасы аясында «Samruk-Kazyna Trust» әлеуметтік жобаларды дамыту қоры қолға алып отыр, деп хабарлайды Almaty-akshamy.kz
Акция Қазақстан мен ТМД елдері аумағындағы пойыздардың ҚТЖ қызмет көрсететін бағыттарын қамтиды. Бұл мүмкіндікті 1935 жылдың 31 желтоқсанына дейін туған соғыс қатысушылары мен мүгедектері, тыл еңбеккерлері мен еңбек майданының қатысушылары пайдалана алады.
Акция 2014 жылдан бастап жыл сайын өткізіліп келеді. Тек өткен жылы тегін сапарлар 550-ден астам рет пайдаланылды.
2022 жылғы науқан маусым айының соңына дейін жарамды. Алайда ол тағы бір жылға ұзартылуы ықтимал.
"Науқан бойынша жол жүру құжаттарын рәсімдеу үшін билет кассасына жеке басты куәландыратын құжаттың түпнұсқасын және Екінші дүниежүзілік соғысы ардагерінің немесе тыл еңбеккерінің куәлігін ұсыну қажет. ТМД елдеріне барған кезде тегін жол жүру құжаттары (билеттері) тек Қазақстан Республикасының аумағында орналасқан сату пункттерінде рәсімделеді", - делінген хабарламада.
«Жеңіс» жобасы көмекке мұқтаж соғыс ардагерлері мен тыл еңбеккерлеріне әлеуметтік-тұрмыстық қолдау көрсетуге бағытталған. Жобаның басты мақсаты – жеңістің қадірін үнемі есте сақтап, ардақтау. Жоба аясында өңірлерде жүйелі негізде волонтерлік рейдтер ұйымдастырылады.
"2021 жылы 2100-ден астам Екінші дүниежүзілік соғыс ардагері мен тыл еңбеккеріне еріктілер 6700-ге жуық рет барды. Қазақстанның 35 қаласы мен ауданындағы 650 ерікті қарт адамдарға азық-түлік жеткізіп, тұрмыстық көмек көрсетті, үйлерінің аулаларын тазалады, қоршауларды сырлап, шатырларын бүтіндеді, қысқа отын дайындады. Ерекше мұқтаж ардагерлер қажетті тұрмыстық техникамен қамтамасыз етілді", - делінген хабарламада.
