Мемлекет басшысы Қасым-Жомарт Тоқаев Қазақстан халқына кезекті Жолдауын жариялады. Кемелді, көкейтесті мәселелер көтеріліп, жаңа мүмкіндіктерге жол ашатын бағдарлар нақтыланды. Президент белгілеп берген маңызды межелерге қол жеткізу – Қазақстанның қазіргіден де биік асуларды бағындырып, қуатты мемлекетке айналуына зор мүмкіндік ашпақ. Еліміздің бүгінгі таңдағы жетістіктері аз емес. Тәуелсіз Қазақ Елін төрткүл дүние танып, мойындады. Ендігі жерде қажырлы еңбегіміз – Отанымызды әлемдік ауқымдағы өрісі кең, халықаралық аренада лайықты беделге ие, өркендеген елге айналдыруға жұмылдыруға бағытталуы тиіс.
Жолдаудағы ірі басымдықтардың бірі – Жаңа Қазақстанның басты бес бағыты: жаңа экономикалық саясат, экономиканың нақты секторын дамыту, ел болашағына арналған стратегиялық инвестиция, мемлекеттік басқару ісін қайта жаңғырту, заң мен тәртіпке ерекше басымдық беру.
Бұл басымдықтар – Жаңа Қазақстанның бес тұғыры. Жолдауда әлеуметтік және экономикалық саясаттың арасындағы тепе-теңдік сақталған. Мысалы, жеке бастамалар ынталандырылады, «балық берме, қармақ бер» принципі ескеріледі. Жастар кәсіпкерлігін дамыту үшін жеңілдетілген кредит беріледі.
Жалпы, Президент аманаттаған тапсырмалардың салмағы жоғары. «Ұлы істер қиын кезде туындайды» дегендей, солардың ішінде елімізге кіретін су көздерінің азаюы, судың 40%-ның жерге сіңіп кетуі мемлекет үшін ең өзекті мәселелердің біріне айналып отыр деп ойлаймын.
Президент Әділетті Қазақстанды бірге құруға, қасиетті Отанымызды бірге өркендетуге шақырды. «Ұйымдаса білген – ұтады» дейді халық даналығы. Жаңа Қазақстан ұлтымыздың жарқын болашағы жолындағы маңызды қадам болмақ.
