Түркияда зілзала құрбандарының саны 5,4 мыңнан асты
Табиғи апат салдарынан 5 775 ғимарат қираған
Түркиядағы екі жойқын жер сілкінісінен қаза тапқандар саны 5434-ке жетті, 31 777 адам жарақат алды, деп хабарлайды Almaty-akshamy.kz ҚазАқпарат агенттігіне сілтеме жасап.
Түркия Үкіметі жанындағы төтенше жағдайлардың алдын алу және жою басқармасы (AFAD) апат аймағындағы соңғы мәліметтерді жариялады.
Ведомствоның мәліметінше, табиғи апат салдарынан 5 775 ғимарат қираған.
Еске сала кетсек, дүйсенбі, 6 ақпанда, Түркияның оңтүстік-шығысында магнитудасы жеті балдан асатын екі жер сілкінісі болды (жергілікті уақыт бойынша 04.17-де – 7,7 балл және 13.24-те-7,6 балл).
Президент Режеп Тайып Ердоған Түркияда апат құрбандары үшін жеті күндік Жалпыұлттық аза тұту туралы жариялады.
Сондай-ақ, қазақстандық құтқарушылар Газиантеп қаласының орталығында іздеу жұмыстарын бастап кеткен. Түркияға 41 адамнан тұратын топ барды, оның ішінде республикалық жедел-құтқару жасағының құтқарушыларынан бөлек, Апаттар медицинасы орталығының қызметкерлері де бар.
