Тұрғындар өтініші жерде қалмайды: "Зерделі" шағынауданындағы апатты үйлерді бұзу туралы шешім қабылданды
Бұл мәселе Алматы әкімінің Алатау ауданының тұрғындарымен кездесуінде көтерілді.
Алматы әкімі Ерболат Досаев аудан жұртшылығымен кездесті, деп хабарлайды Almaty-akshamy.kz.
"Зерделі" шағынауданындағы мәселелерге арнайы тоқталуды жөн көріп отырмыз. Өткен кездесулерде шағынаудан тұрғындары балаларға қауіп төндіретін салынып бітпеген екі көп қабатты үйге және үйлердің сейсмикалық күшейту жұмыстарын аяқтау қажеттілігіне қатысты алаңдаушылық білдірді. Тұрғындардың өтініші бойынша осы жылдың соңына дейін аудандағы апатты үйлерді бұзу туралы шешім қабылданды. Олардың орнына жасыл саябақ аймағы мен балалар алаңын салу жоспарланған», - деді қала әкімі Ерболат Досаев.
Сондай-ақ, тұрғындардың өтініштері бойынша биыл шағынаудандағы 63 үйдің қасбеттері сырланады. Қажетті қаржыландыру бөлінді, мердігер ұйым анықталды. Жұмыстар тамыз айында басталып, ағымдағы жылдың қараша айында аяқталады.
Шағынаудандағы үйлерді жөндеу жұмыстары жүргізіліп, қирағалы тұрған үйлер мәселесі шешіледі. Бүгінгі күні барлығы 30 үйдің 23-і бойынша нығайту жұмыстары аяқталды. Қалған 7 үй бойынша жұмыстар ағымдағы жылдың желтоқсанына дейін аяқталады.
Сондай-ақ, тұрғындардың өтініші бойынша биылғы жылдың тамыз айынан бастап Момышұлы көшесінің қасындағы жерүсті жаяу жүргіншілер өткелінің лифтілерін қалпына келтіру жұмыстары басталады. Мердігер ұйым анықталды, жұмыстар ағымдағы жылдың қазан айында аяқталады.
