Төреғали Төрәлі Көлсайда жас жігітті не үшін ұрғанын айтты

Төреғали Төрәлі Көлсайда жас жігітті не үшін ұрғанын айтты
Сурет: Polisia.kz

Жанжал жаңа клиптің түсірілімі барысында шыққан

"Бейнебаянның түсіріліміне кедергі жасады". Алматы облысының Талғар ауданында тергеу абақтысында отырған әнші Төреғали Төрәлі Ұлттық паркте белгісіз адамды ұруының себебін осылай түсіндірді, деп хабарлайды Almaty-akshamy.kz Рolisia.kz-ке сілтеме жасап.

«Уақытша ұстау изоляторында отырған Төреғали Төреәлі Көлсайда болған жағдай бойынша өз нұсқасын айтты. Оның сөзінше, жанжал жаңа клиптің түсірілімі барысында шыққан. Жәбірленуші олардан көзін алмай, жұмысына кедергі келтірген. Өзара ерегіс соңы әншінің жұдырық жұмсауымен аяқталған. Сондай-ақ әлеуметтік желіге тараған видеодан әртістің балағат сөздер айтқанын аңғаруға болады.
Аталған құқық бұзушылық ҚР Қылмыстық кодексінің 293-бабы «Бұзақылық» бойынша тіркелген», - деген полиция мәліметінде.

Еске салайық, оқиға 28 қыркүйекте Алматы облысы Кеген ауданындағы Ұлттық парк аумағында болды. Әлеуметтік желіде белгісіз жігіт Төреғали Төрәлі оның қабағын жарып, жұдырықтағанын жеткізген еді. Қылмыстық іс Сотқа дейінгі тергеп тексеру тізілімінде тіркелді. Бүгін әнші тергеу абақтысына қамауға алынды.