Теннисші Бейбіт Жукаев ҚР Президенті кубогының 3 дүркін чемпионын ұтты

Теннисші Бейбіт Жукаев ҚР Президенті кубогының 3 дүркін чемпионын ұтты
Сурет: Inform.kz

Қазақстандық теннисші ресейлік әріптесімен кездесті.

Қазақстандық Бейбіт Жукаев Нонтабуриде (Таиланд) өтіп жатқан ATP Challenger Tour Bangkok Open 3 турнирін жеңіспен бастады, деп хабарлайды Almaty-akshamy.kz ҚазАқпаратқа сілтеме жасап.

Дүниежүзілік рейтингте 395-орында тұрған Б.Жукаев алғашқы айналымда әлемнің 331-ракеткасы, Қазақстан Президенті кубогының үш дүркін чемпионы, ресейлік Евгений Донскоймен кездесті.

Қазақстандық теннисші тартысты матчта 7:6 (7:4), 7:6 (7:4) есебімен жеңіске жетті.

Екі сағаттан сәл астам уақытқа созылған бәсеке барысында Жукаев 7 эйс жасап, 8 брейк-пойнттың екеуін пайдаланды. Қарсыласы 9 эйс, 2 брейкпен (6 брейк-пойнт) көзге түсті.

Ақтау теннис мектебінің түлегі ширек финалға шығу үшін әлемнің 242-інші, жарыстың 1-ракеткасы, жапониялық Есукэ Ватанукимен таласады.

Тағы бір қазақстандық, әлемнің 250-ракеткасы Тимофей Скатов Севилья (Испания) челленджер додасының екінші айналымына шықты. Ол бастапқы кездесуінде әлемнің 208-ракеткасы, италиялық Рауль Бранкаччионы 6:4, 6:4 есебімен тізе бүктірді.

Т.Скатов дүниежүзілік рейтингте 408-сатыда тұрған испаниялық Хавьер Косано Барранкомен ширек финал жолдамасын сарапқа салады.

Еске сала кетейік, бұдан бұрын ТОП-10-ға кіретін бес теннисшінің Astana Open ATP 500 турнирінде өнер көрсететінін жазған болатынбыз.