Түрксіб ауданының ықшамаудандарын сумен орталықтан жабдықтандыру қолға алынады

Алматы қаласының әкімі Бақытжан Сағынтаев жаңадан қосылған ықшамаудандардағы жолдар мен сумен жабдықтау желілері құрылысының барысын тексерді.

Шаһар басшысы жұмыс сапары кезінде мегаполиске жаңадан қосылған ықшамаудандардағы инженерлік коммуникациялардың, жолдардың және әлеуметтік нысандардың құрылысымен танысты.
Бақытжан Сағынтаев өзінің Instagram-дағы аккаунтында Әлмерек, Нұршашқан және Қайрат ықшамаудандарындағы сумен жабдықтау және су бұру жүйесімен толықтай қамтамасыз етілетін инженерлік желілердің құрылысы жақын арада аяқталатыны туралы айтты.


«Атқарылған жұмыстың сапасын тексереміз. Бұл ретте бізге көшелердің жай-күйіне алаңдайтын жергілікті белсенді тұрғындар көмектеседі. Жаңа жол салу, жол жөндеу жұмыстары көктемде басталады. Бұл жұмысты алдағы екі жылда аяқтауды жоспарлап отырмыз», — деп жазды қала әкімі.

Сондай-ақ, мегаполис басшысы №195 мектепті кеңейту жоспарларымен, Әлмерек ықшамауданындағы дәрігерлік амбулаторияның және мәдени-спорт кешенінің құрылысымен танысты. Ағымдағы жылы №59 мектептегі оқушы орны ұлғайтылып, қайта жөндеу басталады. Сейфуллин және Оқушылар үйінің жанындағы жалпыға ортақ скверлерді жөндеу жоспарлануда. Ержанов көшесінен Шацкий көшесіне дейін, теміржол жолдарының қиылысында, жаяу жүргіншілерге арналған өткел салу мүмкіндігі қарастырылуда.

Өткен жылы «Жұмыспен қамтудың жол картасы» аясында Сауранбаев көшесінде ыңғайлы орындықтары бар жаяу жүргіншілер аймағы, әр түрлі жастағы балаларға арналған ойын және спорт алаңдары салынды.

«Серуен мен демалыс аймағына айналған «Арбат» ауданның көрікті, ал тұрғындардың ең сүйікті орны. Құқықтық тәртіпті сақтау үшін мұнда модульдік полиция бекетін қоюды тапсырдым», — деп жазды Б. Сағынтаев.

Еске салсақ, жолдарды, көше жарықтарын, инженерлік коммуникацияларды салу «Жаңа Алматы» жаңадан қосылған аумақтарды кешенді дамыту жоспарына сәйкес жүзеге асырылуда.

Атап айтқанда, Түрксіб ауданының Әлмерек шағынауданында бірінші кезеңде 852 үй су құбыры желісіне қосылады. Жоба мамыр айында аяқталады, содан кейін қалған 261 үйге желілер салудың екінші кезеңі қарастырылады. Сондай-ақ, көктемде жолдарды жөндеу және салу жұмыстары басталады. 54 көшенің ішінде ұзындығы 5,9 шақырым болатын 8-інде ғана асфальтбетон бар, қалған 46-сы — 14,6 шақырым топырақты жол.

Нұршашқан ықшамауданында 836 үйдің барлығы дерлік сумен жабдықтау және судан бұру желілерне қосылады, олардың құрылысы осы жылдың жазына дейін аяқталады деп жоспарланған. Жолдарды салу және жөндеу жұмыстары көктемде басталмақ. Алдағы екі жылда ұзындығы 16,6 шақырым болатын 5 көшедегі жұмыстарды аяқтау жоспарлануда. Оның ішінде ұзындығы 5,1 шақырым болатын 25 көше асфальтталмаған.

Қайрат ықшамауданында 1292 үйдің барлығы дерлік орталықтандырылған сумен жабдықтау және судан бұру жүйесіне қосылатын болады. Құрылысты жаздың басында аяқтау жоспарланған. Жолдарды жөндеу және салу жұмыстары көктемде басталады. Ұзындығы 36,6 шақырым болатын 93 көше бар, оның ішінде 78 көшедегі ұзындығы 29,3 шақырым жол топырақты. Жобаны екі жыл ішінде аяқтау жоспарланған.

Толығырақ

Ұқсас ақпараттар

Добавить комментарий

Ваш e-mail не будет опубликован. Обязательные поля помечены *