Президент бейбіт жиналыстар мен шерулерге ешкім кедергі келтірмейтінін айтты
Қасым-Жомарт Тоқаев заңсыз демонстрацияға шығатындарға ескерту жасады
Аналар қоғам алдында өз жауапкершілігін терең сезінуі керек. Бұл туралы Қазақстан халқы Ассамблеясының кеңейтілген отырысында Мемлекет басшысы Қасым-Жомарт Тоқаев айтты, деп хабарлайды Almaty-akshamy.kz ҚазАқпаратқа сілтеме жасап.
«Шын мәнінде, ана дегеніміз - отбасының ұйытқысы, ананың орны ерекше. Оны бәріміз де білеміз. Сондықтан біз қоғамда анаға деген құрметті өте жоғары қоюымыз керек. Сонымен қатар аналар да қоғам алдында өз жауапкершілігін терең сезінуі керек. Кейбір көп балалы аналарымыз заңсыз шерулерге шығып, айқай-шу көтеріп, қоғамдық тәртіпті бұзып отыр», - деді Мемлекет басшысы.
ҚР Президенті масылдықты қоғамның өзекті, тіпті саяси проблемасы деп атауға болатындығын баса айтты.
«Біз «Бейбіт жиналыстар туралы» өте жақсы заң қабылдадық. Кім не айтса да, бұл - демократияны дамыту жолындағы маңызды қадам. Бейбіт жиналыстар мен демонстрацияларға ешкім де кедергі келтірмейді. Онда бәрі жазылған. Ресми рұқсат алу қажет. Бұл жиналыстар, демонстрациялар хабарландыру режимінде де өткізіле алады. Бірақ, осынау болмашы талапты кейбір азаматтар бұзуға болады деп есептейді. Осы тектес әрекеттерге құқықтық баға беріледі. Бас прокуртураның міндеті - азаматтарымызға осы заңды түсіндіруді жалғастыру, ал барлық құқық қорғау органдарының міндеті қоғамдық тәртіпті, заңнамамызға сәйкес қолдау», - деді Қасым-Жомарт Тоқаев.
