Парламент маңызды заңды Тоқаевтың қол қоюына жіберді
Құжатта мемлекет басшысының өкілеттілігін қысқарту, сайлау жүйесін өзгерту және тағы басқа маңызды мәселелер бар.
Сенат депутаттары президенттің наурыз айындағы жолдауын іске асыруды көздейтін заңды қабылдады, деп хабарлайды Almaty-akshamy.kz
Осы заңмен 8 бірдей конституциялық заңына өзгеріс енгізіліп отыр. Президент туралы заңда бұған дейін айтылған бастамалар бекітіледі. Олар:
президент үшін саяси партияларға мүше болуға шектеу қою;
президенттің жақын туыстарына саяси мемлекеттік қызметшілер, квазимемлекеттік сектор субъектілерінің басшылары лауазымдарына орналасуға шектеулер енгізу;
сенат депутаттарын, конституциялық сот және жоғары сот кеңесі төрағаларын тағайындау жөніндегі өкілеттіктерді өзгерту;
Парламентке қатысты өзгерістер:
Сенатты қалыптастыру тәртібін және оның бірқатар функциясын қайта қарау;
аралас сайлау жүйесін енгізу;
мәжілістегі Қазақстан халқы ассамблеясының квотасын алып тастау;
парламент палаталарында заңдарды қарау және қабылдау тәртібін қайта қарау.
«Сайлау туралы» конституциялық заңға енгізілетін түзетулер:
мәжіліс пен мәслихаттар депутаттарын мажоритарлық жүйе бойынша сайлау;
мажоритарлық жүйе бойынша сайланған мәжіліс пен мәслихаттар депутаттарын кері шақыртып алу;
аудандар мен облыстық маңызы бар қалалардың әкімдерін сайлау;
аумақтық сайлау комиссияларын кәсіби негізге ауыстыру;
сайлау алдындағы әлеуметтік желілердегі үгіт-насихатты жүргізу;
сайлау қорларына берілетін қайырымдылықтардың шекті мөлшері;
сайлау науқанына қатысушылардың қаржылық ашықтығын қамтамасыз ету;
сайлауға шетелдік араласуға жол бермеу;
саяси партияны тіркеуге қажетті адам санын 5 мыңға дейін азайту;
саяси партияны тіркеу үшін аймақтық өкілдердің санын 200 адамға дейін қысқарту;
саяси партияны құру үшін бастамашыл топтағы адамдардың санын 700-ге дейін азайту.
Бұдан бөлек, заңда президенттің қайта сайлау құқығынсыз өкілеттік мерзіміне қатысты мәселені референдумға шығаруға тыйым салынады.