Парламент Елбасы туралы заңның күшiн жоюға қатысты құжатты қарайды

28 желтоқсан күні талқылауға алынды.

Қазақстан Парламентінің депутаттары Елбасы туралы заңның күшiн жоюға қатысты құжатты қарайды, деп хабарлайды Almaty-akshamy.kz ҚазАқпаратқа сілтеме жасап.

«Аталған заң жобасы республикалық референдум қорытындылары бойынша ел Конституциясына енгізілген өзгерістерді іске асыру мақсатында әзірленді. Атап айтатын болсақ, биылғы 8 маусымдағы заңмен Конституцияға енгізілген түзетулерге сәйкес, Қазақстанның Тұңғыш Президентінің мәртебесі мен өкілеттігі Республика Конституциясымен және конституциялық заңмен айқындалады деген норманы көздейтін Ата Заңның 46-бабы 4-тармағы алынып тасталды. Осыған байланысты, бұл заң жобасымен құқықтық негіздің жоқтығын ескере отырып, тиісті Конституциялық заңның күшін жою көзделеді», - деді Мәжілістің Заңнама және сот-құқықтық реформа комитетінің төрағасы, депутат Арман Қожахметов палатаның жалпы отырысында.

Осы орайда ол Мәжіліс комитеті заң жобасын талқылауға алатынын айтты.

Еске салсақ, жыл басында Сенат мемлекеттік бастамаларды Елбасымен келісу қажеттілігін жоюды ұсынды.

Сонымен қатар 2 ақпанда Парламент Елбасы туралы заңға түзетуді қабылдады.

ҚР Әділет министрі Қанат Мусин "Тұңғыш Президент туралы" заңға түсініктеме берді.