Орталық Азияда төтенше жағдай кезінде хабарлайтын бірыңғай жүйе құрылады
Аталмыш бастаманы Қазақстан ТЖМ басшысы Юрий Ильин көтерді.
Қазақстаның ТЖМ басшысы Юрий Ильин Душанбеде өтіп жатқан Орталық Азия елдерінің төтенше ведомстволары басшыларының кеңесі барысында аймақтағы елдерде кез келген төтенше жағдай туралы шұғыл хабар тарататын жүйені құруды ұсынып, қауіп-қатер туындағанда өзара хабардар болудың маңыздылығын атап өтті, деп хабарлайды Almaty-akshamy.kz.
Мәселенің өзектілігін Орталық Азия елдерінің төтенше ден қою ведомстволары растады.
«Қазақстандық тараптың ұсынысы шеңберінде сейсмикалық датчиктерді ғана емес, сонымен қатар Орталық Азия елдеріндегі қолданыстағы ТЖ мониторингі жүйелерінің метеорологиялық, гидрологиялық және басқа датчиктерін интеграциялау жоспарлануда»,- делінген ТЖМ баспасөз қызметінің хабарламасында.
Бұл бастама сейсмикалық, сел, көшкін, сырғыма қаупі жоғары жергілікті жерлерде ТЖ туралы ерте хабарлауға мүмкіндік береді.
Министрлер кездесуінде ұсынылған мәліметтерге сәйкес, Орталық Азия климаттың өзгеруінің қолайсыз салдарымен күресте үлкен қауіп-қатерлерге тап болуда. Климаттың өзгеруінің сумен байланысты апаттарға әсері негізгі қауіптердің бірі болып танылды. Мәселен, температураның төмендеуі байқалады, бұл мұздықтардың еруіне және мұздық көлдердің пайда болуына әкеледі.
Аймақтағы мұздықтар көлемінің қысқаруының қазіргі қарқыны жылына 0,2-1% құрайды. Бұл факторлар су тасқыны қаупін тудырады. Бұл ретте, жер сілкінісі, сырғымалар, сел, қар көшкіні, техногендік сипаттағы тәуекелдер және т. б. сияқты тәуекелдерге көбірек көңіл бөлінеді.
«Тәуекелдерді азайтуды қамтамасыз етуде заманауи тәсілдерді енгізу мәселелерінде халықаралық және үкіметтік емес ұйымдармен ынтымақтастыққа үлкен мән бере отырып, біз өңір елдеріндегі әріптестерімізбен екіжақты және көпжақты негізде тығыз және практикалық өзара іс-қимылға ерекше назар аударамыз», - деп атап өтті Юрий Ильин.
Кеңес аясында Юрий Ильиннің БҰҰ Еуропа мен Орталық Азиядағы апаттар қаупін азайту жөніндегі басқармасының Өңірлік кеңсесінің басшысы Октавин Биволмен және БҰҰ ЕЭК атқарушы хатшысының орынбасары Дмитрий Марьясинмен, Түркияның табиғи апаттар мен төтенше жағдайларды басқару агенттігінің Вице-Президенті Исмаил Палакоглумен екіжақты кездесулері өтті, онда ТЖ алдын алу және жою ісіндегі ынтымақтастық пен өзара іс-қимылдың өзекті мәселелері талқыланды.
