ОПЕК+ отырысы қарсаңында "қара алтын" бағасы 3 пайызға қымбаттады

ОПЕК+ отырысы қарсаңында "қара алтын" бағасы 3 пайызға қымбаттады
Сурет: Aa.com.tr

2,8 пайыз қымбаттап, барреліне 87,50 долларға жетті.

ОПЕК+ ұйымының 2020 жылдан бері мұнай өндіруді барынша қысқарту жоспарлары аясында дүйсенбі күні Азия нарығындағы таңертеңгі саудада мұнай бағасы 3 пайыздан астам көтерілді, деп хабарлайды Almaty-akshamy.kz ҚазАқпаратқа сілтеме жасап.

Дүйсенбіде Brent маркалы мұнай фьючерстері жұма күні сессия жабылар алдында 0,6 пайызға арзандаған соң, 2,36 доллар немесе 2,8 пайыз қымбаттап, барреліне 87,50 долларға жетті.

Өз кезегінде АҚШ-тың West Texas Intermediate (WTI) мұнайы алдыңғы сессияда 2,1 пайызға төмендегеннен кейін 2,27 доллар немесе 2,9 пайыз қымбаттап, барреліне 81,76 долларды құраған.

Баға өсімі ОПЕК+ ретінде танымал мұнай экспорттаушы елдер ұйымының нарықты қолдау мақсатында мұнай өндіруді күніне 1 млн баррельден астам қысқарту жоспарлары аясында болды.

Ұйым мұндай мүмкіндікті осы сәрсенбі, 5 қазанда, өтетін алдағы отырыс қарсаңында қарастыруда. Мұндай шешім қабылданса, бұл пандемия басталғаннан бері мұнай өндірудің ең үлкен қысқаруы болмақ.

Осыған қарамастан, нарық сарапшылары өндірістің қысқаруының энергиямен қамтамасыз етуге әсері жалпы көрсеткіштерден айтарлықтай төмен болады деп есептейді, өйткені ОПЕК+ мүшелерінің көпшілігі ұйымның квоталары рұқсат еткеннен әлдеқайда аз өнім шығарып отыр.