«ОЛ – ӘЛЕМ БІЛУГЕ ТИІС ЖАЗУШЫ»

Дулат Исабеков Мәскеуде оқырмандармен кездесті

Аягүл МАНТАЙ

«Дулат Исабеков – интеллектуал, ойлы жазушы. Оның шығармалары орыс оқыр­мандары үшін, орыс әдебиетшілері үшін де құнды дүние. Ол – әлем білуге тиіс жазу­шы». Бұл сөзді Дулат Иса­бековтің Мәс­кеуде өткен кездесуінде «Художественная литература» баспа­сының директоры, жазушы Георгий Пряхин айтты.

Мәскеудегі Горький атындағы Әдебиет институтында өткен кешке Ресейдің белгілі қаламгерлері Н.Анас­тасьев, Б.Рябухин,  А.Потемкин, Г.Мих­ров және басқа да орыс әдебиет­танушылары қатысып, қазақ жазушы­сын жетпіс бес жылдық мерей­тойымен құттықтады.

Кешті ашқан Горький атындағы Әде­биет институтының проректоры, жазу­шы, әдебиеттанушы Сергей Дмитренко: «Біздің институтта ақын, жазушы, әдебиеттанушы болсам деген арманы бар жастар оқиды. Біз олардан әлем әдебиетін жақсы білуді талап етеміз. Олар енді Дулат Исабековтің шығар­маларын да қызыға оқитын болады», – деді.

Кешті жүргізген жазушы Георгий Пряхин Дулат Исабековтің шығарма­шы­лық ерекшелігіне баса тоқталып, талантты қазақ жазушысын Ресейде кеңінен жарна­малау керек екенін айтты. «Дулат Исабеков – адамзаттық деңгейде ойлайтын жазушы. Әрбір шығармасы адамзаттық ой айтады. Оның шығар­малары барлық уақыттың талабына жауап береді.

Дулат Исабековтің төрт томдық таң­дамалы шығармалар жинағы біздің баспа­дан жарық көрді. Маусымның 3-і мен 6-сы аралығында Мәскеуде өтетін «Красная площадь» атты кітап көрме­сінде қазақ жазушысының төрт том­дығын оқырман назарына ұсынамыз», – деді Г.Пряхин.

Әдебиеттанушы Маргарита Орлова: «Дулат Исабековтің шығармаларын алғаш оқыған кезде «Біз оқып жүрген көптеген шетел жазушыларынан әлде­қайда мықты жазушы.  Осындай жазушыларды Ресейде кеңінен жарна­малау керек», – деп ойла­дым. Жазушы  шығармаларындағы қазақ ауылындағы адамдардың аңғалдығы, тазалығы, олардың ешбір ұлтқа ұқсамай­тын ерекше мінездері есімнен ұзақ уақыт кетпей  қойды. Жазушы өз оқырманда­рына еркіндік береді, бұл кез-келген жазушының қолынан келмейтін қасиет. Еркіндік дегенде мен нені меңзеймін?  Кейбір жазушылардың шығармаларын оқып отырып, кейіпкердің аянышты тағдырына жаның ашып, сары уайымға салынып, әрі қарай оқығың келмей қала­ды ғой. «Бұл не деген бітпейтін қайғы» деп ойлайсың ғой. Ал Дулат Исабековтің шығармаларында тағдырлы кейіпкердің өзі жарыққа ұмты­лады. Сол жарыққа кейіпкермен қосылып, сен де ұмтыласың. Өзіңнің көкейіңде жүр­ген сұраққа жауап табасың. Міне, шебер­лік! Міне, талант!  Дулат Исабе­ковтей жазушысы бар қазақ – бақытты халық», – деп жазушы шығармашы­лығына жоғары баға берді.

Мәскеу мемлекеттік Заң академия­сының аспиранты Олжас Тұрсынбаев: «Дулат Исабеков Мәскеуге келеді, мәскеу­лік оқырмандарымен кездеседі» дегенді естігенде, осында білім алып жатқан қазақ жастары қатты қуандық. Жазушымен кездесуді асыға күттік. Кеште өзін-өзі қинап, амалсыздан келген бірде-бір адам бол­мады. Қазақ жастары бар, орыс жастары бар – бәрі де жарыса сұрақтар қойды. Жазушы­ның салмақты, юмор араласқан жауа­бын айтсаңызшы!  Бір сөзбен айтқанда, естен кетпейтіндей керемет кеш бол­ды»,– дейді.

Кеште Мәскеу мемлекеттік лингвис­тика­лық университетінің студенттері, қазақ тілін үйреніп жүрген орыс жастары жазушыны мерейтойымен қазақ тілінде құттықтап, гүл шоғын тарту етті. Кеш соңында жастар Дулат Исабековтен жары­са қолтаңба алып, суретке түсіп жатты.

Рас, әлемді рухани дағдарыстан Дулат Исабеков сынды  ойлы, интел­лектуал жазу­шылар ғана құтқарады.