Нұрлан Нығматулин ТүркПа-ның Бас хатшысын қабылдады

Нұрлан Нығматулин ТүркПа-ның Бас хатшысын қабылдады
Сурет: Parlam.kz

Тараптар алдағы жұмыс бағыттарын талқылады.

Мәжіліс Төрағасы Нұрлан Нығматулин Түркітілдес елдер Парламенттік Ассамблеясының жаңа Бас хатшысы  Мехмет Сюрейя Эрды қабылдады, деп хабарлайды Almaty-akshamy.kz

Отырыста Палата Спикері Түркістанда ТүркПА-ның X-ші пленарлық отырысын жоғары деңгейде өткізілгенін, сондай-ақ, жуық арада Ыстанбұлда өткен Түркітілдес мемлекеттердің ынтымақтастық кеңесінің 8-ші Саммитінде тарихи шешімдер қабылданғанына назар аударды.

Нұрлан Нығматулин атап өткендей, соның ішінде Қазақстанның Тұңғыш Президенті, Түркі кеңесінің Құрметті төрағасы Нұрсұлтан Назарбаевтың бастамасымен Түркітілдес мемлекеттер ынтымақтастығы кеңесінің атауы «Түркі мемлекеттері ұйымы» атауына өзгерді.

«Түркі әлемінің келешегі - 2040» құжатының қабылдануы, сонымен қатар, Түрікменстанның ұйымға бақылаушы мәртебесіне ие болуы Ұйым дамуындағы жаңа кезең. Мәжіліс Төрағасы ТүркПА-ның да атауын «Түркі мемлекеттерінің Парламенттік Ассамблеясы» деп өзгертудің уақыты келді деп санайтынын айтып, Хатшылық бұл мәселені заңнамалық деңгейде қамтамасыз ету керектігіне мән берді.

Отырыс барысында ТүркПА-ға қатысушы мемлекеттердің ұлттық заңнамаларын үйлестіру және жақындастыру жұмыстарын жүйелі түрде жүргізілу қажеттілігі айтылып, ТүркПА-ның 2022-2027 жылдарға арналған заң жобалау қызметінің бағдарламасына ерекше назар аударылды.