«Мұзтау» және «Көлсай» шағынаудандарын сумен қамтамасыз ету үшін магистральдық желі жобасы әзірленіп жатыр
Алматы әкімі Ерболат Досаев Медеу ауданының тұрғындарымен кездесті.
Аудан тұрғындарымен өткен кездесуде сумен жабдықтау мәселесі көтерілді, деп хабарлайды Almaty-akshamy.kz
Қазіргі уақытта Мұзтау, Көлсай, Сұлусай және Кеңсай шағынаудандарында орталық су жүйесі мен су көзі жоқ.
"2021 жылы «Мұзтау» және «Көлсай» шағын аудандарында 32 км. сумен жабдықтау және су бұрудың таратушы желілері салынды.
Қазір осы шағынаудандарды су көзімен қамтамасыз ету үшін «Балқаш» су жинау станциясына дейін жалғаушы магистральдық желі жобасы әзірленіп жатыр. Жобалау құжаттары осы жылдың тамыз айында дайын болады", - деді қала әкімі Ерболат Досаев.
Құрылыс-монтаждау жұмыстары келесі жылдың көктемгі кезеңінде (2023 жылғы сәуір) басталады.
«Сұлусай» шағынауданы бойынша «Алматы Су» осы жылдың тамыз айында магистральдық су құбыры және канализация желілерін салу жобасын аяқтайды. Скважиналар қазылады.
Жобаны іске асыру 2023 жылға жоспарланған. «Сұлусай» шағынауданының оңтүстік бөлігінде скважиналар қазылады (ең жоғары нүктесі).
«Кеңсай» шағынауданындағы М.Шоқай және Сәрсенбаев көшелеріне сумен жадбықтау мен су бұрудың магистральдық желілерін салу жобасы әзірленді. Құрылысы 2023 жылға жоспарланған.
"Алайда, бау-бақша серіктестіктерінде көшелердің тар болуынан жеті метрлік инженерлік дәліз жүргізілмеген. Сондықтан тарату желілерін салуға мүмкіндік жоқ. Жобаны іске асыру тұрғындардың өздеріне байланысты. Сіздер қажетті дәлізді ұсынатын болсаңыздар, біз бірден сумен жабдықтау және канализация желілерін сала аламыз", - деді шаһар басшысы.
