Мемлекеттік білім грантына құжат тапсыру мерзімі бір күнге ұзартылды
Білім және ғылым министрлігі грант тағайындау конкурсына қатысу үшін құжат қабылдау 25 шілдеде аяқталады деп жоспарлаған болатын. Алайда 25 шілде жексенбіге сәйкес келгендіктен, құжат қабылдауды тағы бір күнге созуға шешім қабылдады, деп хабарлайды almaty-akshamy.kz
«Талапкерлерден құжат қабылдау мерзімін ұзарту туралы өтініштер келіп түсті. Өйткені құжат тапсырудың соңғы күні жексенбіге келеді. Осыған байланысты БҒМ құжат қабылдауды тағы бір күнге – 26 шілдеге дейін ұзарту туралы шешім қабылдады. Құжаттар жоғары оқу орындарының виртуалды қабылдау комиссиялары арқылы қабылданатынына назар аударуларыңызды сұраймыз», - делінген хабарламада.
Талапкерлердің денсаулығын қорғау мақсатында еліміздің барлық жоғары оқу орындарында виртуалды қабылдау комиссиялары жұмыс істейді. Олардың көмегімен конкурсқа қатысу үшін құжаттарды онлайн форматта тапсыруға болады.
Виртуалды қабылдау комиссияларының тізімімен http://testcenter.kz сайтынан таныса аласыздар.
