Мемлекет басшысы Ақмола облысының әкімі Марат Ахметжановты қабылдады

Мемлекет басшысы Ақмола облысының әкімі Марат Ахметжановты қабылдады
Сурет: Akorda.kz

 Марат Ахметжанов Ақмола облысының әлеуметтік-экономикалық дамуы, өңір экономикасының бірқатар саласында оң нәтижелер бар екені туралы мәлімет берді, деп хабарлайды аlmaty-akshamy.kz. 

Сонымен қатар, негізгі капиталға салынған инвестиция көлемі 530 миллиард теңгеге жеткенін сөз етті. Оның ішінде жеке инвестиция 435 миллиард теңгеден асқан. 154 жоба іске асырылып, 1,5 мың жұмыс орны ашылған.

Облыс әкімі Президентке шаруаларды қолдау және қайта өңделген өнім үлесін арттыру шаралары тұрақты түрде қабылданып жатқанын айтты. Жыл басынан бері өсімдік майы, өңделген ет, сүт, май, ірімшік және сүзбе сияқты азық-түлік түрлерін өндіру көрсеткіші өскенін, Макинск құс фабрикасының 3-кезеңі іске қосылғанын және «Ақ-Дала Агро» жауапкершілігі шектеулі серіктестігінің өндірістік қуаты кезең-кезеңімен артып келетінін хабарлады. Бұл облыстың құс етін өндіру бойынша елімізде көшбасшы өңірлердің біріне айналуына мүмкіндік берген.

Облыс басшысы жылыту маусымының барысы туралы баяндады. Бүгінгі күні барлық коммуналдық қызметтің жұмысы қатаң бақылауға алынғанын, Көкшетау және Степногорск қалаларындағы нысандар кезең-кезеңімен жаңғыртылғанын жеткізді. Көкшетау қаласын дамытуға қатысты бас жоспардың жобасы әзірленгені туралы ақпарат берді. Бұл жоба қаланың экологиялық және инфрақұрылымдық мәселелерін шешуді көздейді. Халықтың тұрмысын жақсартуға және іргелес миграцияны төмендетуге ықпал ететін Агломерацияны дамыту жөніндегі жаңа кешенді жоспардың жобасын таныстырды.

Қасым-Жомарт Тоқаев өңірді одан әрі дамыту, ауыл шаруашылығы өнімдерін терең өңдеу жобаларын іске асыру, инвестиция тарту, сондай-ақ Ақмола облысының қалаларын жылумен үздіксіз қамтамасыз ету жөнінде бірқатар тапсырма берді.