Медеу ауданында жыл соңына дейін 355 камера орнатылады
Қауіпсіздікті қамтамасыз ету мақсатында адамдар көп жиналатын жерлерде 213 бейнебақылау камерасыжұмыс істейді.
Бұл туралы бүгін қала әкімі Ерболат Досаевтың Медеу ауданы тұрғындармен кездесуінде айтылды, деп хабарлайды Almaty-akshamy.kz.
«Жыл соңына дейін аудан аумағында барлығы 355 камера орнатылады, оның ішінде Сіздердің өтініштеріңіз бойынша Кеңсай шағын ауданы мен «БХБ» және «Барвиха» барларының жанында камералар орнатылды», - деді Ерболат Досаев.
Бұдан басқа, қазір жолдардың бойы мен көше қиылыстарында 123 «Сергек» камерасы бар (57-і желілік учаскелерде, 66-ы – көше қиылыстарында). Қосымша тағы 58 камера орнатылады (45-і - желілік учаскелерде, 13-і – көше қиылыстарында), жұмыстар 2023 жылдың ІІ-ші тоқсанында аяқталады.
Интернет және мобилді байланыс
«Өткен кездесулерде Кеңсай шағын ауданындағы мобилді байланыс пен Интернеттің сапасын жақсарту мәселесі көтерілді. Бүгінгі таңда «Кселл» мобилді байланыс операторының 2 базалық станциясы күшейтілді. Сондай-ақ, «Beeline» және «Tele2» компаниялары жылдың соңына дейін 2 станция орнатады», - деді қала әкімі Е.Досаев.
Сондай-ақ «Меганет» жауапкершілігі шектеулі серіктестігі Интернеттің талшықты-оптикалық байланыс желісінің кабельдерін жүргізуде. Монтаждау жұмыстары
2023 жылдың IV-ші тоқсанында аяқталады.
Мұзтау шағын ауданында байланыс сапасын жақсарту бойынша осындай жұмыстар жүргізілуде. Жыл соңына дейін бір базалық станция жаңғыртылады.