ҚТЖ мен полиция қызметкерінен құралған қылмыстық топ ұсталды
Келтірілген шығын 127 миллион теңгеден асады.
Тергеу пікірінше, ұрланған төсемдер, шпалдар, рельстер және басқа да тауарлар жарамсыз немесе белгілі бір ақаулары бар жол төсемінің жоғарғы құрылымының бөліктерімен ауыстырылды деп жалған мәліметпен есептен шығарылған, деп хабарлайды Almaty-akshamy.kz Бас көлік прокуратурасына сілтеме жасап.
Бас көлік прокуратурасының үйлестіруі бойынша, Көліктегі департаменттің Ұйымдасқан қылмысқа қарсы күрес басқармасы екі жыл бойы темір жолдардың жағдайын жақсартуға арналған материалдарды ұрлаумен айналысқан қылмыстық топты әшкереледі.
"Қылмыстық топқа "ҚТЖ "ҰК" АҚ-ы Қарағанды бөлімшесінің қазіргі және бұрынғы 17 жұмысшысы тартылған. Оларға полиция қызметкері қамқорлық жасаған. Алдын ала есептелген шығын 127 миллион теңгеден аса сомаға бағаланды, бұл 800 тоннаға жуық материалдар", - делінген хабарламада.
Бүгінде ұрланған тауарлардың көпшілігін сатып алушылары мен орналасқан жерлері, сондай-ақ оларды тасымалдайтын жүк көліктері анықталғаны айтылды.
"Соттың санкциясы бойынша, Жаңаарқа жол дистанциясының учаске бастығы және оның орынбасары, сондай-ақ желілік полиция бөлімшесінің бастығы тергеу изоляторына қамалды. Тергеу мүддесі үшін өзге ақпарат ҚПК-нің 201-бабының сәйкес жарияланбайды", - делінген хабарламада.
