Көкпардан Қазақстан құрамасы Өзбекстанды жеңді

Көкпардан Қазақстан құрамасы Өзбекстанды жеңді
Сурет: Ulttyqatsport.kz

Түркияның Изник қаласында өтіп жатқан IV Дүниежүзілік көшпенділер ойындарының алғашқы күнгі нәтижесі белгілі болды.

Көкпардан ел құрамасы Өзбекстанды 8:1 есебімен жеңіп, келесі айналымға өтті. Қазақстандықтар қатарынан Құрманбек Тұрғанбек үш салым салса, Абылайхан Нышанбеков, Арман Жамалбеков, Ынтымақ Әліпбаев, Ислам Рәт, Айнабек Бердіқұл бір-бір салымға ие болды, деп хабарлайды Almaty-akshamy.kz ҚазАқпаратқа сілтеме жасап. 

Дәстүрлі садақ атудан Қасымхан Қанат, Али Сессигузель, Азамат Нұртаев жартылай финалға жолдама алды.

Сондай-ақ, әйелдер арасында Айым Тілепберген мен Аяулым Аппазова үздік 16 мергеннің қатарына енді.

Көшпенділер ойындарына әлемнің 102 елінен 3 мыңнан астам спортшы қатысуда. Қазақстанның атынан 50 спортшы сайыстың бес түрінен бақ сынасады. Олар – көкпар, қазақ күресі, дәстүрлі садақ ату, жамбы ату, көкбөрі.

Еске салсақ, IV Дүниежүзілік көшпенділер ойындарының салтанатты ашылу рәсімі өтті.