Кейбір мемлекеттер екпенің үшінші дозасын алып жатыр

Коронавирустық инфекциялар туралы статистика қорқынышты болғандықтан кейбір мемлекет халыққа вакцинаның үшінші дозасын ұсынып отыр.

Атап айтқанда, Германияның 16 федералды штатының денсаулық сақтау министрлері осыған келіскен, деп хабарлайды Almaty-akshamy.kz Еuronews.com сайтына сілтеме жасап.

 Сонымен қатар вакциналау бағдарламасына 12 мен 17 жас аралығындағы тұрғындарды қосу туралы шешім қабылданды. Қазіргі уақытта Германияда халықтың 52%-дан астамы вакцинаның екі дозасын да алды.

Израильде бес ай бұрын екпе салынған 60 жастан асқан азаматтарды қосымша егу науқаны өтіп жатыр. Президент Ицхак Герцог алғашқылардың бірі болып американдық Pfizer компаниясы препаратының үшінші дозасын алды. Елдің Денсаулық сақтау министрлігінің мәліметінше, бүгінде коронавирус жұқтырғандардың 40%-ы балалар мен жасөспірімдер екен.

Сонымен қатар, вакциналау мен шектеу шараларына қарсы халықтың бір бөлігінің наразылығы да артып келеді. Польшада белгісіз адамдар Замосць қаласындағы вакциналау бекеті мен эпидемиологиялық станцияны өртеп жіберді. Польша билігі бұл оқиғаны террорлық акт деп атады.

Денсаулық сақтау министрі Адам Нидзельский: «Бұл әрекеттер жергілікті медицина қызметкерлеріне деген қарсылық қана емес, бұл мемлекетке қарсы бағытталған терроризм», - деді.

Соңғы кезде агрессияның мұндай көріністері жиілеп кетті. Гдыния қаласында антивакселдер демалыс күндері жылжымалы екпе станциясына шабуыл жасады. Әлеуметтік сауалнамалар көрсеткендей, Польша тұрғындарының төрттен бір бөлігі екпе алғысы келмейді немесе вакцинаның тиімділігіне әлі де күмәнмен қарайды.