Қазақстандықтардың электронды қызметке деген сұранысы артып келеді
Мемлекет азаматтарына 18 құжат өзге цифрлық платформаларда қолжетімді.
Қазақстан Үкіметі мемлекет азаматтары арасында цифрлық сервистерге деген сұраныс артып отырғанын айтады, деп хабарлайды Almaty-akshamy.kz.
«Бүгінде электронды қызметтер саны бойынша, оң өзгерісті байқап отырмыз. Сонымен қатар EGov Mobile мобильдік қосымшасында да электронды қызметтерді пайдалану екі есеге өскен. Бұдан бөлек, цифрлық сервистер азаматтар арасында кең сұранысқа ие. Мәселен, цифрлық құжаттар осы жылдың 5 айында 6 млн-нан астам валидациялағанын атап өткен жөн. Жалпы, бұл меморогандар мен мекемелердің цифрлық құжаттарды кеңінен қолдануын айғақтайды», - деді Цифрлық даму, инновациялар және аэроғарыш өнеркәсібі министрі Бағдат Мусин Үкімет отырысында.
Ведомство басшысының айтуынша, қазір азаматтарға 18 құжат өзге цифрлық платформаларда қолжетімді. Осы жылдың соңына дейін ең танымал 20 мемлекеттік қызметті сыртқы платформаларға шығару жоспарланған.
«Сондай-ақ SMS арқылы заңсыз тіркелу мәселесін шештік. Байланыс орталығының күту уақытын 5 минуттан 20 секундқа дейін қысқарттық. Азаматтарды құжаттандыру бойынша адами факторсыз ұсынылатын, жаңа перспективалық жобаны іске асырудамыз. Егер бүгінгі таңда орташа есеппен 20-30 минут кетсе, терминалдарды орнатқан соң, процесс 5-10 минутқа дейін қысқарады», - деді Бағдат Мусин.
Айта кетсек, «Видео ХҚО» жобасы азаматтарға кеңес алудан бөлек, ЦОН-ға жүгінбей-ақ қызметті қашықтан алуға мүмкіндік береді. Осы тәсіл арқылы 13 қызмет қолжетімді, ал жыл соңына дейін 63 қызметке дейін өседі. «Осыған орай, меморгандармен бірлесіп, 2025 жылға дейін азаматтарға консультация және қызмет көрсетуді осы «Видео ХҚО» тәсілі арқылы ұсынуды жоспарлап отырмыз», - деді Цифрлық даму министрі.
