Қазақстанда жарықтың өшу себебін анықтау үшін арнайы комиссия құрылды
Барлық өңірлердің тұтынушыларына жарық қайта берілді.
Қазақстанда арнайы комиссия құрылды. Бұл комиссия оңтүстік өңірлерде электр энергиясын өшіру себептерін тексереді, деп хабарлайды Almaty-akshamy.kz.
«Қазақстан Республикасы Энергетика вице-министрінің басшылығымен оңтүстік өңірлердің тұтынушыларын электрмен жабдықтауға себеп болған «КЕGOC» АҚ электр желілерінде технологиялық бұзушылықтың туындауы және даму себептері мен шарттарын объективті және жан-жақты анықтау мақсатында арнайы комиссия құрылды», - делінген ҚР Энергетика министрлігі баспасөз қызметінің хабарламасында.
Тексеріс нәтижелері бойынша орын алған технологиялық бұзушылықтарға алдағы уақытта жол бермеу, сондай-ақ Қазақстан Республикасының Бірыңғай электр энергетикасы жүйесінің жұмыс істеу тұрақтылығын арттыру жөніндегі ұйымдастырушылық және техникалық іс-шаралар әзірленетін болады.
Естеріңізге сала кетейік, 25 қаңтарда Алматы, Жамбыл, Түркістан, Қызылорда облыстарында және Алматы мен Шымкент қалаларында электр энергиясы апаттық жағдайда ажыратылып, сол күні сағат 16.00-де Қазақстанның оңтүстік аймағының барлық өңірлерінің тұтынушыларына жарық қайта берілді.
