Қазақстан Үкіметі шаруаларға трейдерлер арқылы несие беруді ұсынды

Қазақстан Үкіметі шаруаларға трейдерлер арқылы несие беруді ұсынды
Сурет: Mk-kz.kz

70 млрд теңге көлемінде қосымша бюджеттік несие бөлу тапсырылды.

Қазақстан Үкіметі жанындағы дағдарысқа қарсы шаралар жөніндегі жедел штабтың кезекті отырысында егін егуді қосымша қаржыландыру және ауыл шаруашылығы өндірісі үшін тауарларды жеткізу логистикасы мәселелері талқыланды, деп хабарлайды Almaty-akshamy.kz Eldala.kz cілтеме жасап.

Ағымдағы сыртқы саяси жағдай техника, тұқым, генетикалық материал, минералды тыңайтқыштар және басқаларды қоса алғанда, ауыл шаруашылығы тауарларына әлемдік, оның ішінде қазақстандық бағалардың өсуіне түрткі болатыны атап өтілді. Бұл туралы Премьер-Министрдің баспасөз қызметі хабарлады.

Кепілмен байланысты мәселелерді шешу үшін фермерлерде қажетті өтімді кепілдіктері бар астық және май нарығының трейдерлері арқылы аграршыларға несие беру мүмкіндігін қарастыру ұсынылды.

Бұған дейін Ауыл шаруашылығы министрлігіне Қаржы және ұлттық экономика министрліктерімен, «Бәйтерек» ҰБХ-мен бірлесіп, республикалық бюджетті нақтылау аясында көктемгі егіс және егін жинау жұмыстарын жүргізуге 70 млрд теңге көлемінде қосымша бюджеттік несие бөлу тапсырылды.

Сонымен қатар, минералды тыңайтқыштар бағасын төмендету бойынша жұмыстар жүргізілуде. 16 наурыздан бастап аммиак селитрасының құны тоннасына 200 мың теңгеден 160 мың теңгеге дейін төмендеді.

Азық-түлік қауіпсіздігін арттыру туралы айта келе, АШМ басшысы импорттық тәуелділікті төмендету үшін меншікті тұқым сұрыптарын әзірлеу бағдарламасы туралы хабарлады. Атап айтқанда, Ауыл шаруашылығы министрлігі отандық тұқымдарды өсіру бойынша жол картасын әзірледі.

«Қысқа мерзімде отандық тұқым сұрыптарының ғылымын дамыту бойынша орта мерзімді бағдарлама қабылдау қажет. Тұқымның қазіргі сұрыптары нашарлап, өнімділік төмендеуде. Жылдан-жылға құрғақшылықтың күшеюіне тұрақты үрдіс байқалады. Бұл орайда құрғақшылыққа төзімді және өнімнің үлкен көлемін беретін тұқымдардың жаңа сұрыптарын әзірлеу аса маңызды», - деп атап өтті Премьер-Министр Әлихан Смайылов.

Сондай-ақ, Үкімет ҚР Индустрия және инфрақұрылымдық даму министрлігіне «Қазақстан темір жолы» АҚ-мен бірлесіп, ауыл шаруашылығы өндірісі үшін тауарлық-материалдық құндылықтарды уақтылы жеткізу үшін қосымша жылжымалы құрамды қамтамасыз етуді, сондай-ақ Ресейден тұқым импорты бойынша жеткізудің балама бағыттарын пысықтауды тапсырды.