Қазақстан қай елдерге жиі ақша жібереді?

Грузия, Қырғызстан, Ресей, Түркия, Өзбекстан алғашқы бестікке кіреді.

Ұлттық банк біздің елден қай елдерге жиі ақша жіберілетінін айтты, деп хабарлайды Almaty-akshamy.kz

Алынған трансферттер бойынша 5 елдің көш басында Оңтүстік Корея тұрды, одан кейін АҚШ, Өзбекстан, Қырғызстан, ең соңында Ресей рейтингті жапты.

Ұлттық банктің мәліметінше, 2022 жылы Халықаралық ақша аудару жүйелері (ХААЖ) арқылы жүзеге асырылған ақша аударымдарының жалпы көлемі - 1,8 трлн теңге. 2021 жылмен салыстырғанда операциялардың 32,7% өскені байқалады.

"Транзакциялардың негізгі үлесі, яғни 94,7%-ы - Қазақстан мен басқа елдер арасындағы трансшекаралық ақша аударымдары. 2022 жылға шетелге жіберілген және шетелден алынған ақша аударымдарының орташа сомасы шамамен бірдей: сәйкесінше 415 мың теңге және 413 мың теңге", делінген ҚҰБ баспасөз қызметі таратқан ақпаратта.

Бұл ретте Қазақстаннан шетелге жіберілген ақша аударымдары сомасы 2,4%-ға біршама өсе түскен тұста ХААЖ арқылы басқа елдерден алынған ақшалай аударымдардың көлемі айтарлықтай (2,4 есе) өскені байқалады.

"2022 жылы ХААЖ арқылы алынған ақша аударымдарының өсуі Ресейден (6,8 есеге), Қырғызстаннан (өсім 2,8 есеге) және АҚШ-тан (33% өсім) ақша аударымдары көлемінің ұлғаюымен байланысты болды", - делінген ҚҰБ баспасөз қызметінің мәліметінде.

Сонымен қатар 2022 жылы Қазақстанда ақша аударымдарының көлемі 34,6% өскені хабарланды. ХААЖ арқылы бір жергілікті ақша аударымының орташа сомасы 178,8 мың теңге болды. Бұл 2021 жылдың сәйкес көрсеткішінен 58,0% артық.