Қазақстан білім берудің Болон жүйесінен шықпайды

Өйткені білімнің рөлі өте зор.

Бұл туралы ҚР Президенті Қасым-Жомарт Тоқаев айтты, деп хабарлайды Almaty-akshamy.kz

«Кезінде Болон жүйесіне күмәнмен қараған едім. Оған қосылған кезде Сенат төрағасы болдым және Үкіметке бұл істе асығыстық танытудың қажеті жоқ екендігін ескерттім. Сол уақытта оған қосылуымыз үлкен ұлттық жетістік, тіпті мереке ретінде көрсетілді. Іс жүзінде оның да өте көп кемшілігі бар және оларды байқаған едім. Бұл медальдің екі жағы бар. Негізінде Ресей Үкіметінің Болон жүйесінен шығуы туралы шешімін түсінемін. Бірақ, оның салдары да болатынын түсіну қажет», - деді Қасым-Жомарт Тоқаев ресейлік журналист Андрей Кондрашовқа берген сұхбатында.

Мемлекет басшысы елімізде білім беру саласына баса назар аударылып отырғанын айтты.

«Өйткені білімнің рөлі өте зор. Мен ресейлік техникалық жоғары оқу орындарының Қазақстанда филиалдарын ашуына қатысты бастама көтердім. Бұл процесс басталды. Мәскеу инженерлік-физикалық институты ҚазМУ-де филиалын ашты. Губкин атындағы мұнай және газ университеті де филиалын ашады. Меніңше, бұл процесс жалғаса береді. Өйткені, қазіргі қазақ жастары бәсекеге қабілетті болуы үшін, ең алдымен, техникалық білім алуы тиіс деп есептеймін. «Болашақ» бағдарламасы арқылы талантты жастарды шетелге жіберу мүмкіндігі де сақталып отыр. Атап айтқанда, олар магистранттар, тіпті бакалавриаттар да. Біз бакалавр бағдарламасын қысқартып, әлемнің үздік жоғары оқу орындарына баратын магистранттардың санын арттырамыз», - деді ҚР Президенті.