Кәсібилік, адалдық және қарапайымдылық біздің басты қағидаттарымыз болуға тиіс – Тоқаев

Кәсібилік, адалдық және қарапайымдылық біздің басты қағидаттарымыз болуға тиіс – Тоқаев
Сурет: Akorda.kz

Қоғамда жаңа құндылықтар орнықтырып, жақсы қасиеттерге ие бола алмасақ, реформаның бәрі бекер. Бұл туралы ұлықтау рәсімінде Қазақстан Республикасының Президенті Қасым-Жомарт Тоқаев айтты, деп хабарлайды Almaty-akshamy.kz Inform.kz-ке сілтеме жасап.

«Бір сөзбен айтсам, кәсібилік, адалдық және қарапайымдылық біздің басты қағидаттарымыз болуға тиіс. Қоғамда жаңа құндылықтар орнықтырып, жақсы қасиеттерге ие бола алмасақ, реформаның бәрі бекер. Көк байрағымыз, төлқұжатымыз және мемлекеттік тіліміз біздің біртұтас халық екенімізді білдіреді», - деді Қасым-Жомарт Тоқаев.

Осы орайда Президент бабаларымыз біртұтас ел болып, Еуразия төрінде даңқты шежіресін ат тұяғымен жазғанын, Алтын орда мен Қазақ хандығы сияқты мемлекеттер құрғанын еске салды.

«Сондай-ақ, халқымыз ел басына күн туған күрделі сәттерде азаттығы үшін арпалысты. Әйгілі хандарымыздың, батырларымыздың және ұлт қайраткерлерінің ерлігі – осының айқын көрінісі», - деді Мемлекет басшысы.