Елімізде "жедел жәрдем" бригадаларының саны артады

Елімізде "жедел жәрдем" бригадаларының саны артады
сурет:kazpravda.kz

ҚР Денсаулық сақтау министрлігі арнайы "жедел жәрдем" бригадаларының санын көбейтпек.

Денсаулық сақтау министрлігі халыққа шұғыл медициналық көмектің сапасы мен қолжетімділігін жақсарту үшін ведомствоның «Жедел медициналық жәрдем, оның ішінде медициналық авиацияны тарта отырып көрсету қағидаларын бекіту туралы» 2023 жылғы 19 қаңтардағы бұйрығына өзгерістер енгізді, деп хабарлайды Аlmaty-akshamy.kz ДСМ сілтеме жасап.

Бұйрыққа сәйкес жедел жәрдем бригадасының құрамына парамедик – алғашқы көмек көрсету бойынша қосымша функцияны орындай алатын және шақыруларға қызмет көрсету бойынша жедел медициналық жәрдем бригадаларының жұмысына қатыса алатын алғашқы көмек көрсету бойынша кәсіптік даярлық курсынан өткен адам кіреді.

Халық саны 100 мың адамнан тұратын моноқалаларда жергілікті атқарушы органдардың қалауына қарай дербес жедел медициналық жәрдем стансалары ұйымдастырылады.

Дәрігерлік бригадалардың саны құрамына мамандандырылған (дәрігерлік), оның ішінде балалар қарқынды терапия бригадалары, бейінді бригадалар (кардиологиялық, педиатриялық) кіретін бригадалардың жалпы санының кемінде 25% құрайды.

Бүгінде елімізде 1500-ге жуық жедел медициналық жәрдем бригадасы жұмыс істейді, оның 18% - мамандандырылған дәрігерлік бригадалар.

Талдау көрсеткендей, қанайналым жүйесінің аурулары мен балалардағы ауруларға байланысты қиындықтар жиі кездеседі.

Сондай-ақ, жедел жәрдем стансаларына медициналық ақпараттық жүйелерге қолжетімділік беріледі, бұл үйлестіруші ұйым үшін медициналық көмек көрсетуде интеграцияны қамтамасыз етеді.

«Жедел жәрдем стансалары 10 мың және одан аз халыққа шаққанда бір бригаданың есебінен бригадамен жарақтандырылатынын, ал медициналық-санитариялық алғашқы көмек ұйымдарындағы ЖМК бөлімшелері халықтың өтінішін ескере отырып, 35 мың және одан аз халыққа шаққанда бір бригаданың есебінен бригадамен жарақтандырылатынын естеріңізге саламыз», - деп хабарлады министрліктен.

Диспетчерлердің ауылдық елді мекендердегі шақыруларға қызмет көрсетуі үшін аудандық қосалқы стансаларға мамандар, сондай-ақ жақын маңдағы медициналық ұйымдардың санитариялық автокөліктері тартылуы мүмкін.

Бұл инновациялар ЖМК қызметінің ел халқына шұғыл медициналық көмек көрсетудің сапасы мен қолжетімділігін жақсартуға мүмкіндік береді.