Елімізде үш айда 4 мыңнан астам интернет-алаяқтық жасалған
Бұл туралы криминалдық полиция департаменті киберқылмысқа қарсы күрес орталығының бастығы Жандос Сүйінбай мәлімдеді.
Қазақстандықтар үш айда 3 миллиард теңгеге алданды, деп хабарлайды Almaty-akshamy.kz
"Алаяқтық жасаудың ең көп тараған тәсілі – онлайн сауда, ол белгілі сауда алаңдарының сайттарында, сондай-ақ әлеуметтік желілер мен мессенджерлерде жарнамаларды орналастыру арқылы жүзеге асырылады. Алаяқтар тауарға немесе қызметке төмен баға көрсетіп, алдын ала төлемді немесе толық төлемді сұрайды. Биыл осындай 2 мыңнан аса қылмыс тіркелді", - деді Сүйінбай бүгінгі онлайн брифингте.
Алаяқтардың құрбаны болмау үшін бірнеше қарапайым сақтық шарасын ұмытпау керек. Олар:
тексерілген жарнама сайттарын пайдалану;
тауарды алғаннан кейін төлем жасау;
тауардың бар екеніне көз жеткізу.
Ал сатушы басқа қалада болса, тауарды таныстар немесе туыстар арқылы жіберуді сұрауға болады.
