Елімізде ең жоғары жалақы алатындар кімдер?

Ұлттық статистика бюросы Қазақстанда ең жоғары айлықты кімдер алып жүргені туралы мәлімет ұсынды, деп хабарлайды Almaty-akshamy.kz ҚазАқпаратқа сілтеме жасап. 

«Жалақының ең жоғары мөлшеріне қатысты келесіні хабарлаймыз. Бюро жыл сайын «Жалақы құрылымы және оны бөлу туралы есеп» статистикалық нысаны негізінде кәсіпорындарға зерттеу жүргізеді. Есепті жылдың сәуір айында толық жұмыс істеген барлық қызметкерлер зерттеуге жатады.

Осылайша, 2021 жылдың қорытындысы бойынша, ең жоғары жалақы «Азаматтық құрылыс» саласындағы басқарушыда (коммерциялық қызметте) – 4,5 млн теңге сомасында, сондай-ақ «Шикі мұнай және табиғи газ өндіру» саласындағы бас директорда – 3,9 млн теңге және «Автомобильдер мен мотоциклдер саудасынан басқа көтерме саудада сату» саласындағы инвестициялық жобалар жөніндегі директорда – 3,9 млн теңге болып белгіленді. Бұл жерде жалақы мөлшері лауазымға және экономикалық қызмет түрі, аймақ, біліктілік, жұмыс өтілі және басқалары сияқты маңызды факторларға байланысты», - деп жазылған  ведомствоның ресми жауабында. 

Сонымен, ең жоғары айлықтың көлемі 3,9 млн теңгеден басталады десек, оны алатындардың еңбекке жарамды халықтың ішіндегі үлесі 0,1 пайызға да жетпейтін көрінеді.

«2021 жылғы зерттеу қорытындысы бойынша, зерттеуге қатысатын адамдардың жалпы санынан 3,9 млн теңгеден астам жалақыны 0,1% төмен адам алды. 275 мың теңгеден астам жалақыны 28,4% адам алды», - деп жазады Ұлттық статистика бюросының мамандары.

Бұған дейін бюро қазақстандықтардың орташа жалақысы 312 мың теңгеден асқаны туралы мәлімет таратқан еді.

Сондай-ақ, жан басына шаққандағы орташа айлық табысы 50 мың теңгеге жетпейтін қазақстандықтардың үлесі 38,7% болып отыр.

Ұлттық статистика бюросы Қазақстанда ең көп кездесетін айлық көлемін атады.