ДІНИ САУАТСЫЗДЫҚ ЖАСТАРДЫҢ САНАСЫН УЛАП ЖАТЫР

Өтеш ӨТЕУЛІҰЛЫ

Елбасы Н.Назарбаевтың «Бо­ла­шаққа бағдар: рухани жаң­ғыру» атты тарихи мақаласында «Қарқынды дамы­ған Қазақ­стан қоғамының ұйытқысы, мемле­кет өзегі – жан-жақты рухани жаң­ғыру болмай, толыққанды өр­кениет сатысына көтерілу мүмкін еместігі» атап көрсетілді.

Адам баласының түрлі халық­тардан, ұлт пен ұлыстан тұратынын еске алсақ, олардың әрқайсысының өзіне тән ерек­шеліктері, тілі мен дәстүрі, діни наным­дары бар. Әр ұлттың діні мен сеніміне, тұрмыс-тіршілігіне, ұлттық құрылым ерек­шелігіне сәйкес ғасырлар бойы жинақталып, өмірдің өзі туғызған ғұрып­тардың жиынтығы – қауым мен қоғамда қалыптасқан мінез-құлықтың озық үлгілері болып табылады. Ата-бабалары­мыз сан ғасырдан бері аңсаған Тәуелсіз­дігімізге қол жеткізу­дің арқа­сында асыл дініміздің қайнар бұлақ­тарымен қайта қауышып жатыр­мыз. Ұлт жадынан ұмытыла бастаған имани құнды­лықтарды жаңғыртудың сара жолы ашылды. Асыл мұрат­тарымызды қалың бұқараға ұғынық­ты жеткізу үшін қазақтың тілі мен тарихын, мәдениеті мен әдебиетін кеңінен насихаттау міндеті қойылды. Өкінішке қарай, соңғы кездері халқымызды исламнан аластатуға тырысушылық әрекеттері белең алып жүр. Осы орайда дін мен дәстүр сабақтастығын, салт-сана мен діни нанымның бір арнада тоғыса­тындығын дәлел-дәйектер арқылы анықтап алудың маңызы зор.

Елбасымыз Н.Назарбаев Қазақ­стан мұсылмандары Діни басқармасы өкіл­де­рімен кездесуінде «Діни сауат­сызды­ғының нәтижесінде жастарымыз сақал қойып, шалбарының балақтарын қысқар­тып тастайды. Қара көйлек киіп, бет-аузын тұмшалаған қыздары­мыздың қатары көбейді. Бұл – біздің дәстүрі­мізге де, халқымызға да жат. Бұған заңнама­лық деңгейде тыйым салу мәселесін пысықтау керек. Қазақ қара киімді қаралы кезде ғана киеді» деп атап көрсет­ті. Елбасымыз хид­жаптың да ұлттық киім үлгісіне жат­пайтынын бұрын да талай рет айтқан болатын. Біздің халқымыз ұстанып отырған ханафи мазхабы діл мен дәстүрдің негізі болып табылады.

Қазіргі кезде қауқитып сақал қойған, шалбарының балағын шорт кескен жастарға күдікпен қарайтын болдық. Жастардың имандылыққа бет бұрғаны жөн де шығар, бірақ, біздің халқымызда жастар аталарымен, әкелерімен жағала­сып сақал қоймаған еді. Еліміздің дін басшылары соңғы кезде исламның ваха­бизм мен сала­физм ағымдарының ықпа­лы күшейіп келе жатқанына алаңдау­шылық білдіреді. Елбасымыз айтқандай, діни сауатсыз­дықтың салдары рухани сауатсыздыққа алып келді. Дінге бет бұрдық екен деп, өзіміздің қазақ хал­қының салт-дәстүрі мен әдет-ғұрпы­нан алшақтау – мақсатсыз, қараңғы түнек­ке бет алу болып табылады.

Ұлттық табиғатымызбен сабақтас асыл дүниелерімізді, жауһарлары­мызды түгендеу, тамыры терең дәстүрлерімізді құрметтеу – қазақтың толыққанды ұлтқа, сол арқылы Алаштың іргелі еліне айна­луына жол ашады. Қасиетті Ораза айын­да ислам дінінің мақсаттары мен мұраттарын бұқараға кеңінен насихат­тау үшін халқымыздың ана тілі мен өткен тарихын, төл мәдениетін жетік мең­геріп, түсіндіру жұмыстарын жүйелі де мақсатты жүргізу міндеті қойылады.

Толығырақ

Ұқсас ақпараттар

Добавить комментарий

Ваш e-mail не будет опубликован. Обязательные поля помечены *