Бүгін еліміз бойынша Мәжіліс пен мәслихаттар сайлауы өтіп жатыр
Almaty-akshamy.kz дауыс берушіге сайлауға барғанда не қажет, нені білуі тиіс деген сұрақтарға жауап іздеп көрді.
Қандай құжаттар керек?
Әр сайлаушы жеке дауыс беретінін білуі керек. Сайлау бюллетенін алу үшін жеке куәлік болуы керек. Дауыс беру тұрғылықты жері бойынша әкімдіктер құратын сайлаушылар тізімі бойынша жүргізіледі. Оған белсенді сайлау құқығы бар Қазақстан азаматтары кіреді: 18 жасқа толған, әрекетке қабілетті және сот үкімі бойынша бас бостандығынан айыру орындарында отырмағандар.
Дауыс беру қалай өтеді?
Сайлау бюллетені сайлаушыға жеке басын куәландыратын құжатты көрсеткен кезде сайлаушылар тізімі негізінде беріледі. Келесі кезекте сайлаушы бюллетеньді алғаннан кейін тізімге қол қояды. Сайлаушылар бюллетеньдерді жасырын дауыс беру кабинасына кіріп, толтырады.
Дауыс беру бюллетенінде сайлаушы кандидаттың тегінің немесе өзі дауыс беретін саяси партияның атауының оң жағына не "Барлығына қарсы" жолының оң жағындағы ұяшыққа кез келген белгіні қояды. Сайлаушы толтырылған бюллетеньді сайлау жәшігіне салады.
Дауыс беретін учаскені қалай анықтауға болады?
Алматыда Telegram-да almaty_sailau2023_bot бар, сондай-ақ 1315 нөмірі бойынша бірыңғай байланыс орталығы жұмыс істейді.
Мәжіліс депутаттығына қандай партиялар ұсынылған?
Мәжіліс сайлауына жеті саяси партия жіберілді, олардан 283 кандидат қатысып жатыр. Дауыс беруге арналған бюллетеньге партия атаулары жеребеде анықталған тәртіппен енгізіледі.
Сайлау күні не істеуге тыйым салынады?
Сайлаудың міндетті талаптарының бірі - дауыс беру рәсімі. Дауыс беру рәсімі жабық кабинада өтеді, онда сайлаушыдан басқа ешкім болмауы керек. Қарауға да тыйым салынады. Сайлау учаскелерінде тек аккредиттелген журналистер ғана фото және видео түсіре алады.