Бүгін бокстан әлем чемпионатында 4 қазақстандық қыз шаршы алаңға шығады

Бүгін бокстан әлем чемпионатында 4 қазақстандық қыз шаршы алаңға шығады
Сурет: Inform.kz

Бокстан әйелдер арасындағы әлем чемпионатында бүгін, 11 мамырда қазақстандық төрт спортшы шаршы алаңға шығады, деп хабарлайды Almaty-akshamy.kz Inform.kz-ке сілтеме жасап.

Әлем чемпионатына еліміздің атынан 12 боксшы барды. Олардың қатарынан әзірге екі боксшы шаршы алаңға шығып, жарысты жалғастыруға мүмкіндік алды.

Алдымен 8 мамырда ел құрамасынан Валентина Хальзова (70 келі) кениялық Лорна Куса Симбиді тізе бүктірді.

Одан кейін 10 мамырда Алуа Балқыбекова (48 келі) канадалық Приянка Диллоннан басым түсті. Енді 11 мамырда күндізгі сессияда Жайна Шекербекова (52 келі) Пуэрто-Рико елінен келген Мелоди Варгаспен шаршы алаңға шықса, Карина Ибрагимова (57 келі) румыниялық Клаудия Нечитамен кездеседі.

Сондай-ақ, аталған сессияда Аида Әбікеева (63 келі) алжирлік Имане Хелифпен қолғап түйістіреді. Ал кешкі сессияда Надежда Рябец (75 келі) түркиялық Бушра Ишилдармен шаршы алаңға шығады.

Ел құрамасынан алдағы күндерде Назым Қызайбай (50 келі), Дина Жоламан (54 келі), Римма Волосенко (60 келі), Дариға Шәкімова (66 келі), Гүлсая Ержан (81 келі) және Ләззат Күнгейбаева (81 келіден жоғары) сынға түседі.