Бостандық ауданында екі емхана салынады
Бұған қоса жұмыс істеп тұрған екі емхана күрделі жөндеуден өтеді.
Халыққа медициналық көмек көрсету сапасын жақсарту үшін биыл наурыз айында екі объектінің құрылысын аяқтау көзделуде, деп хабарлайды Almaty-akshamy.kz
- «Балалар шұғыл медициналық көмек орталығының» операциялық блогы бар қабылдау бөлімшесінің корпусы;
- «Керуен Medicus» жекеменшік медициналық орталығында 300 адам қабылдайтын әйелдер консультациясы бар перзентхана бөлімшесі.
Осы жылы медициналық мекемелердің жүктемесін азайту үшін 5 объектінің құрылысын салу, реконструкциялау және күрделі жөндеу жобалануда, оның ішінде:
- Әрқайсысы 500 келушіні қабылдайтын 2 жаңа емхана құрылысы. Әл-Фараби даңғылы мен Сырғабеков көшесінің қиылысындағы бірінші емхана бойынша осы жылдың қаңтар айында жобалау-сметалық құжаттама әзірлеу басталды. Оны биыл жылдың соңына дейін аяқтап, мемлекеттік сараптамадан өткізу көзделген. Құрылысты бастау 2024 жылдың 1 тоқсанында жоспарланған.
«Ал екінші жаңа құрылысы - мен осыған дейін айтқан Гагарин даңғылы мен Левитан көшесінің қиылысындағы емхана. Құрылысты бастау 2024 жылдың 2 тоқсанында жоспарланған», - деді қала әкімі бүгінгі кездесуде.
Сонымен бірге жұмыс істеп тұрған екі емхана, яғни №14 және №12 емханалар күрделі жөндеуден өтеді. Бүгінгі таңда жобалау-сметалық құжаттаманы әзірлеу үшін конкурстар өткізілуде. Сараптамасы тамыз айында күтіледі. Күрделі жөндеу 2024 жылдың екінші тоқсанында жоспарланған.
«500 орындық қалалық орталық клиникалық арухананың (№12 больница) жаңа корпусын салу жоспарланып отыр. Осы жылдың қаңтар айында жобалау-сметалық құжаттаманы әзірлеуге конкурс жарияланды, құрылыс-монтаждау жұмыстары 2024 жылдың ІІ тоқсанына жоспарланған», - деді мегаполис басшысы тұрғындармен кездесуде.