Былтыр еліміздегі әрбір алты ломбардтың бірі шығынға ұшырады

Ал, биылғы қаңтар оқиғасының қорытындысы бойынша, тек Алматыдағы ломбардтардың алдын ала шығыны 2,9 млрд теңгені құрапты.

Қаңтар оқиғасының салдарынан еліміздің ломбардтары қатты зардап шекті, деп хабарлайды Almaty-akshamy.kz Finprom.kz сайтына сілтеме жасап.

Қазақстан Республикасы Ұлттық банкінің мәліметінше, 2021 жылдың үш тоқсанының қорытындысы бойынша, Қазақстан Республикасында 602 ломбард тіркелген.

Саладағы меншікті капиталдың жалпы көлемі жартыжылдықтың қорытындысымен салыстырғанда 36,4%-ға немесе 40,2 млрд теңгеге артып, 150,5 млрд теңгені құрады.

2021 жылдың қаңтар-қыркүйек айларында кірістің жалпы сомасы 25,6 млрд теңгені құрады (2021 жылдың қаңтар-маусымының қорытындысымен салыстырғанда плюс 42,6% немесе плюс 7,6 млрд теңге).

Қаңтар оқиғасының салдарынан еліміздің ломбардтары қатты зардап шекті. Негізгі шығын Алматының үлесіне тиді. Мәселен, Алматы әкімдігінің мәліметі бойынша, 2022 жылдың 14 қаңтарындағы жағдай бойынша, қала ломбардтарына келтірілген шығын шамамен 2,9 млрд теңгені құрады. Ең көп зардап шеккен Алмалы ауданындағы ломбардтар (35 ломбард, залал – 2,6 млрд. теңге). Әуезов ауданында 11 ломбард талқандалды.

Қазақстан Республикасындағы барлық 602 ломбардтың 469-ы ғана 2021 жылдың алғашқы үш тоқсанында табысын көрсетті. Бөлінбеген табыстың ең төменгі мөлшері 2 мың теңгені құрады.

Табыс көлемі бойынша алғашқы ондықта M-Lombard (6,1 млрд теңге) көш бастап тұр, одан кейін MK-Lombard (3,8 млрд теңге) және Astra-Lombard (2,7 млрд теңге) келеді. 1 млрд теңгеден астам пайданы «МК-Золото Ломбард» (1,7 млрд теңге) және Safe Lombard (1,4 млрд теңге) компаниялары да алды.

Сонымен бірге 2021 жылдың қаңтар-қыркүйек айларында 102 ломбард жабылмаған шығынын көрсетті. Ең көп шығын "Авто ақша" ломбардында (332,2 млн. теңге), одан кейін Tez Lombard (69,6 млн. теңге) және Lombard Three A (24,1 млн. теңге) болды.