Білім және ғылым министрі "Болашақ" бағдарламасының түлектерімен кездесті

Бас педагог кездесуде "болашақтықтарды" қызықтырған түрлі сұраққа жауап берді.

Жиында назарға алатын қызықты ұсыныстар да айтылды. Кездесу туралы министр өзінің Telegram-дағы каналында жазды, деп хабарлайды Almaty-akshamy.kz

Білім және ғылым министрі Асхат Аймағамбетов «Болашақ» бағдарламасының түлектерімен жиында бағдарламаны одан әрі жетілдіру және қайта бағдарлау, қазіргі стипендиаттардың таңдауы көбірек болуы үшін елдердің географиясы мен университеттер санын кеңейту туралы айтты

«Сонымен қатар шетелдік үздік оқу орындарында білім алып, бүгінде отандастарына пайдасын тигізіп, ел дамуына маңызды үлес қосып жүрген түлектердің әңгімесін тыңдау да қызық болды. Мысалы, Диана Момбаева Канаданың жетекші жоғары оқу орындарының бірі Калгари университетінде «Болашақ» бағдарламасы бойынша білім алып, кейін Қостанай облысындағы туған ауылы Комсомолға оралды. Ол қазір ауылдық мектепте тарих пәнінен сабақ береді. Сонымен бірге Диана балаларға ағылшын тілін де тегін үйретеді. Жас педагог Канададан алған білімінің арқасында ауылда тұруға және де ауылдастарының өмірін жақсарту мақсатында қайта оралуға болатынын балалардың өзіне қарап, түсінгенін қалайтынын айтты», - деп жазды министр.

Ал кездесуге қатысқан тағы бір «Болашақ» түлегі, мамморадиолог дәрігер Данара Сүлейменова Ұлыбритания университетінде білім алып, кейін «Болашақ» бағдарламасы аясында АҚШ университетінде тағылымдамадан өткен. Дәрігердің айтуынша, ол қазір сүт бездерінің сәулелік диагностикасының әртүрлі әдістерін – УДЗ, маммография, МРТ-ны меңгерген және қажет болған жағдайда тиісті диагностикалық манипуляцияны тағайындап, орындайды.

«Әрине, «Болашақ» бағдарламасы арқылы білім алған педагогтердің, дәрігерлердің және басқа да түрлі мамандық өкілдерінің еңбегі қоғамымыз бен елімізге маңызды әрі қажет. Біз «Болашақ» бағдарламасын жетілдіруді жалғастырамыз», - деді Асхат Аймағамбетов.