Биыл елімізден 22,6 мың адам көшіп кеткен

Биыл елімізден 22,6 мың адам көшіп кеткен
Cурет: Ашық дереккөз

Көшіп келгендер саны 6 339 адам

Биылғы жыл басынан бергі 8 айда Қазақстанға көшіп келгендер саны 6,3 мың болса, көшіп кеткендері – 22 мыңнан асып жығылды, деп хабарлайды Almaty-akshamy.kz Egemen.kz-ке сілтеме жасап.

ҚР Стратегиялық жоспарлау және реформалар агенттігі Ұлттық статистика бюросы көші-қон қызметі органдарының мәліметінше, 2021 жылғы қаңтар-тамыз аралығында елімізге тұрғылықты тұруға 6339 адам келген.

Елімізден кеткендер саны 22685 адамды құрады.

Солайша, көші-қонның айырымы -16346 адам болды. Еліміздегі негізгі көші-қон алмасуы ТМД мемлекеттерімен өтуде. ТМД елдерінен келгендердің және сол елдерге кеткендердің үлесі 84,1% және 86,1% құрайды.

Ел ішінде қоныс аударатын көшіп-қонушылар саны 2020 жылғы қаңтар-шілдемен салыстырғанда 7,3% артты. Өңіраралық қоныс аудару бойынша халық көші-қонының оң айырымы еліміздің 4 өңірінде байқалды: Алматы (20235 адам), Нұр-Сұлтан (18390 адам), Шымкент (9276 адам) қалаларында және Маңғыстау облысында (346 адам).