Бейсен Құранбек атындағы «Жігер» сыйлығына өтінімдер қабылданады

«Жігер» - журналистік шеберлік саласында әлеуметтік маңызы бар тақырыптарды жариялағаны үшін берілетін кәсіби сыйлық.

Қазақстан Республикасы Ақпарат және қоғамдық даму министрлігі танымал қазақстандық тележурналист Бейсен Құранбек атындағы «Жігер» сыйлығына өтінімдер қабылдаудың басталғаны туралы мәлімдеді, деп хабарлайды Almaty-akshamy.kz 

Байқау «Медиа дамыту қоры» корпоративтік қорымен ынтымақтастықта жүргізіледі.

«Жігер» сыйлығына өтінімдерді қабылдау 2021 жылы 20 тамыздан 20 қыркүйекке дейін «Медиа дамыту қоры» корпоративтік қорының mdq.kz ресми сайтында жүзеге асырылады.

Сыйлықтың негізгі мақсаты – талантты журналист, қоғам қайраткері, Қазақстан Республикасы Президенті сыйлығының лауреаты Бейсен Құранбектің есімін ел жадында өшірмеу, мұрасын сақтап қалу. 

Конкурсқа қатысу шарттары:

Конкурсқа Қазақстан Республикасының Республикалық және облыстық телебағдарламалары қатыса алады;
Конкурсқа ұсынылған материалдар телеэфирде 2021 жылдың 1 қаңтары мен 19 қыркүйек аралығында көрсетілуі тиіс;
Конкурсқа қазақ және орыс тілдеріндегі жұмыстар қабылданады;
Конкурсқа қоғам үшін өзекті мәселелерді және әлеуметтік тақырыпты қозғайтын телебағдарламалар қатыса алады.

Байқау жеңімпаздары «Жігер» естелік мүсіншесінің, дипломның және қаржылай сыйлықтың иегері атанады.

 I орын үшін - 1 000 000 теңге, II орын үшін - 500 000 теңге және III орын үшін - 300 000 теңге.

Байқау қорытындысы мен жеңімпаздар есімдері 2021 жылдың 27 қыркүйегінде белгілі болады.