Бағаны ұстап тұрамыз

Алдымызда келе жатқан үлкен мереке қарсаңында әлеуметтік маңызы бар азық-түлік өнімдері бағасының өсуіне жол берілмеу керек.

Алматы қаласы әкімінің орынбасары Мақсат Қиқымовтың төрағалығымен, күнделікті көп тұтынылатын азық-түлік өнімдерін сататын ірі сауда желілері мен дүкендердің («Магнум», «Small», «Тоймарт», «Carefood», «Metro», «Столичный», «Юбилейный», «Дастархан фуд» және т.б.) өкілдерімен өткен кеңесте осы мәселе талқыланды.

Жиын қорытындысы бойынша Алматы қаласының Кәсіпкерлік және инвестициялар басқармасы, «Алматы «ӘКК» АҚ және кәсіпкерлік субъектілері арасында қант пен жұмыртқа жеткізу жөнінде меморандумдар жасалды. Бүгінгі таңда тікелей жеткізілімдерді ұйымдастыру есебінен «Столичный», «Юбилейный», «Дастархан фуд» дүкендерінде қант бағасының 324 теңгеден 287 теңгеге дейін, «Small», «Metro», «Carefood», «Тоймарт» дүкендерінде 320 теңгеден 280 теңгеге дейін төмендеуі қамтамасыз етілді.

Жұмыртқа (1-ші санаттағы) жеткізуді ұйымдастырудың нәтижесінде «Столичный», «Юбилейный» дүкендерінде бағалар 480 теңгеден 420 теңгеге дейін, «Carefood» желісінде 440 теңгеге дейін төмендеді. Қаланың ірі базарларындағы «Әлеуметтік дүкендерде» бағаны тұрақтандыру үшін картоп бағасы 111 теңгеге дейін, ал сәбіз 120 теңгеге дейін төмендеді. «Тоймарт» сауда желісінде картоп бағасы 199 теңгеден 179 теңгеге дейін арзандады. Сондай-ақ, биыл жылдың соңына дейін «JLC» желісінде сүт пен айран бағасын 3 теңгеге (250 теңгеден 247 теңгеге дейін) төмендету бойынша келісімге қол жеткізілді.

Осы орайда айта кетсек, Алматыда әлеуметтік маңызы бар азық-түлік тауарлары бағасының өсуіне жол бермеу жөніндегі кеңестер апта сайын өткізіледі.