Ақсай шатқалындағы құрғақ шөп әлі өртеніп жатыр

Ақсай шатқалындағы құрғақ шөп әлі өртеніп жатыр
Сурет: Inform.kz

Ақсай шатқалындағы өрт әлі өшкен жоқ

Алматы облысының Ақсай шатқалындағы өрт әлі толықтай өшірілген жоқ. Алматы облыстық Төтенше жағдайлар департаментінің баспасөз қызметінен мәлім еткендей, жақын маңдағы елді мекендерге төніп тұрған қауіп жоқ, деп хабарлайды Almaty-akshamy.kz ҚазАқпарат сайтына сілтеме жасап.

«2021 жылғы 29 қыркүйекте сағат 08-00-дегі жағдай бойынша, Алматы облысы Қарасай ауданының Ақсай шатқалындағы «Іле-Алатау» МҰТП аумағындағы бір учаскеде аздаған бықсу және шымтезек төсенішінің түтіндеуі бар. Бұл аймақтың айналасында жерді қазу және жырту жұмыстары жүргізілді.

Өрт орнында Ақсай орман шаруашылығының, "Қазавиаорманқорғау" және Алматы облысының ТЖД күштері мен құралдары жұмыс атқаруда. ҚР Төтенше жағдайлар министрлігінің «Қазавиақұтқару» АҚ тікұшағы су шашып жатыр. Бүгінгі күні түтінді жоюға 38 адам мен 8 бірлік техника жұмылдырылды.

Елді мекендерге қауіп жоқ. Ең жақын елді мекен – Қырғауылды ауылы 12 шақырым қашықтықта және "Радуга" бау-бақша қоғамы 8 шақырым қашықтықта орналасқан», - делінген хабарламада.

Естеріңізге сала кетейік, 26 қыркүйектен бастап Алматы облысы, Қарасай ауданы, Ақсай шатқалында, «Іле-Алатау» МҰТП аумағындағы жетуі қиын таулы жерлерде, биіктігі 2000 метр жерде орман төсеніші, жапырақтардың және құрғақ шөп өртеніп жатқанын жазған болатынбыз.