Ауғанстаннан эвакуацияланған 200-ге жуық адам күдікке ілінді

Қауіп төндіру ықтималдығына байланысты қосымша тексеруден өтеді.

Германияның «Рамштайн» базасына эвакуацияланған 30 мың ауғанның 200-ге жуығы қауіп төндіру ықтималдығына байланысты қосымша тексеруден өтеді. Бұл туралы штаб бастықтары біріккен комитетінің төрағасы Марк Милли мәлімдеді, - деп хабарлайды Almaty-akshamy.kz Tengrinews.kz-ке сілтеме жасап.

«Мұнда 30 мыңға жуық адам тексеру процесінен өтті, екі жүзге жуығы қызылмен белгіленді», - деді Милли АҚШ-тың Германиядағы базасында FoxNews басылымына берген сұхбатында.

Оның айтуынша, эвакуацияланғандар саусақ ізін тапсырып, базаларда биометрикалық тексеруден өтеді, егер күдік туындаса, олар сары немесе қызыл түспен белгіленеді, ал материалдар ФБР агенттеріне тапсырылады.
Миллидің айтуынша, терроризм 2-2,5 жыл ішінде қайта жандануы мүмкін. Ол америкалық заң шығарушылар алдында дәл осындай позицияны айтқанын еске салды.
Бұған дейін америкалық ақпарат құралдары Америка Құрама Штаттары өз территориясына террористік топтармен байланысы бар деп жүзге жуық ауған босқынынан күдіктенгенін және қосымша тексеруге Косовоға кемінде екеуін жіберуге ниетті екенін хабарлады.
АҚШ шенеуніктері елдің әр аймағындағы сегіз әскери базада 50 мың ауған босқынына арналған орын дайындап жатқанын айтады.