Арнайы комиссия өрттің шығу себептерін тексеруге кірісті

Арнайы комиссия өрттің шығу себептерін тексеруге кірісті
Суретті түсірген - К.Қонысбаев

Бұл туралы Қазақстан Республикасының Төтенше жағдайлар министрі генерал-майор Сырым Шәріпханов Алматы қаласының Өңірлік коммуникациялар қызметінің брифингінде хабарлады. Бүгін министр бейсенбі күні Алматының орталығында болған өрт орнында болды, деп хабарлайды almaty-akshamy.kz

ТЖ Министрі Сырым Шәріпханов өрттің негізгі себептері мен мән-жайын тергеу бойынша арнайы комиссия құрылғанын айтты. Комиссия құрамына ТЖ және денсаулық сақтау министрліктерінің, құқық қорғау органдарының, Алматы қаласы әкімдігінің өкілдері және басқа да мүдделі бөлімшелер кірді.

Бұған дейін хабарланғандай, мемлекеттік өртке қарсы қызмет бөлімшелері құрамында 46 өрт сөндіруші құтқарушы мен 13 техника  жеті минут ішінде оқиға орнына шұғыл жетті. Өрт қысқа уақыт ішінде сөндіріліп, оқшауланды.

"Жұмыс қиындай түсті: тар жолдар, тыныс ала алмайтын орта, қалың түтін. Мұның бәрі өртті сөндіру, барлау жүргізу және үй-жайлардағы адамдарды жылдам іздеу процесін қиындатты. Жертөледе жиналып  тұрған көп ортопедиялық матрас өрт жағдайын қиындатты. Жертөледе болғандардың өрттен қашу мүмкіндігі  өте аз болды. Сонымен қатар, бұл матрацтар өртеніп, жанып, қалың түтін басты ", - деді министр.

ТЖ Министрі атап өткендей, бұл ғимарат бір жарым ай бұрын хостелге заңсыз айналды. Сондай-ақ, хостелге айналдырылған бөлмелер санитарлық және құрылыс нормаларына сай болмады. 

Сонымен қатар, қала әкімдігі өрт кезінде зардап шеккендерге көмек көрсетті. Баспанасыз қалғандар көрші жатақханаларға орналастырылды. Бірқатар зардап шеккендер ауруханаға жатқызылды және оларға медициналық мекемелерде тиісті көмек көрсетіледі. 

"Сондай-ақ, осы жатақханада орналасқан студенттер баспанаға мұқтаж екендіктерін мәлімдемегенін және оқу орны мен әкімдікке баспанаға мұқтаж екендіктерін және осы жатақханада орналасатындығынан хабардар етпегенін атап өткім келеді. Яғни, бұл жатақхананың бар екендігі туралы әкімдікте, басқа органдарда, соның ішінде ТЖД-да ақпарат болған жоқ. Сондай - ақ, ТЖД мен басқа да мемлекеттік органдардың шағын бизнес субъектілерін тексеру іс-шараларын жүргізуге құқығы жоқ екенін атап өткім келеді", - деп толықтырды С.Шәріпханов. 

Соңында министр арнайы комиссия өрттің шығу себептерін тексеруге, болған өрт үшін кінәлі және жауапты лауазымды тұлғаларды анықтауға кіріскенін атап өтті. Бұл оқиғаға кінәлілер жауапқа тартылады.