Ардагер ғалым ардақталды
Алматыда Қазақстан Республикасының Ұлттық Ғылым академиясында ҰОС ардагері Зұлхарнай Сейітовтің ағылшынша шыққан «Biochemister» кітабының тұсаукесері өтті. Сондай-ақ, ардагердің өмірінен хабар беретін фильм көрсетілді. Фильм барысында «Алматы ақшамы» газетінде жарияланған З.Сейітов туралы мақала жайында жақсы айтылып өтті.
«Биохимия» кітабы Ұлы Отан соғысының ардагері Зұлхарнай Сейітовтің 100 жылдығына арналды. Тұсаукесерге Қорғаныс министрінің орынбасары, генерал-лейтенант Мұхамеджан Таласов, ҚР ҚК ардагерлері, Алматы гарнизонының әскери қызметшілері, әкімдік өкілдері және жоғары оқу орындарының профессор-оқытушылар құрамы, сондай-ақ мәдениет, қоғам қайраткерлерімен бірге БАҚ өкілдері қатысты.
«Зұлхарнай Сейітов 22 жасқа толған шағында соғысқа қатысты. Ерлігін көрсетті. Бұдан кейін атамыз ғалым ретінде медицинаға өлшеусіз үлес қосты. Қаншама шәкірт тәрбиеледі. Магистранттар мен докторанттарға арналған «Биохимия» кітабын қазақ, орыс, ағылшын тілдерінде шығарды. 1980 жылы З.Сейітов «Биохимия» кітабы үшін «Тарлан – Платина» сыйлығының номинациясына ие болды. Бұл - классикалық, медициналық, биохимиялық кітап. Онда амин қышқылы, белоктардан бастап зат алмасу процесін, жүйке жүйесін, дәнекер ұлпасын, бауыр биохимиясын сипаттап өтеді. Кітапқа бүгінде шетелдік ғалымдар да өз қызығушылығын танытуда», – дейді биология ғылымының докторы, профессор Камаладин Шәріпов.
Зұлхарнай Сейітов соғыс басталған кезде Ленинград майданына аттанды. Ол қоршауда болды, шайқастарда Сталинградты, Беларуссияны, Польшаны босатты, Берлинді алды. Ардагер «Қызыл Жұлдыз», «Отан соғысы» ордендерімен және «Ерлігі үшін» медалімен марапатталды.
«Бүгінгі шара біздің жастарымызға үлкен тағылым, тәрбие берері сөзсіз. Зұлхарнай Сейітұлының адал ісі қаншама ұрпақты тәрбиелеп өсіріп, бүгінде сол шәкірттері рахатын көріп отыр. Атамыз тірі аңыз адам. Қан майданда ерлігімен де танылған. Фильмде де айтылады ғой, ол кісі мені сақтаған бірінші Құдай болса, екінші әруақтар деп. Қаншама жылдарды артқа қалдырып, елімізге еселі еңбегіңіз тиді. Бай-қуатты болып алдымызда мәңгі жүре беріңіз. Атамызды Қорғаныс министрінің атынан «Ел қорғаны» төсбелгісімен марапаттаймыз», – дейді Қорғаныс министрінің орынбасары, генерал-лейтенант Мұхамеджан Таласов.
Ол соғыстан кейін Отанына қызмет етуді жалғастырды, медицина саласында өз ісінің көрнекті маманы болды. З.Сейітов - биология ғылымының докторы, өнертапқыш, Қазақстанның еңбек сіңірген қайраткері. Ол - «Қазақ бальзамының» және медицина мен биохимиядағы басқа да жаңалықтардың авторы. Бейбіт өмірдегі еңбегі ескеріліп, «Ерен еңбегі үшін» медалімен марапатталған.
