Апта соңына дейін Екібастұздағы барлық үйге жылу беріледі

Апта соңына дейін Екібастұздағы барлық үйге жылу беріледі
Сурет: Almaty-akshamy.kz

Жылу желілеріне қатысты мәселелер шешілді.

Премьер-Министрдің орынбасары - Сауда және интеграция министрі Серік Жұманғариннің болжауынша, апта соңына дейін Екібастұздағы барлық үйге жылу беріледі, деп хабарлайды Almaty-akshamy.kz ҚазАқпаратқа сілтеме жасап.

Министр жылу өшірілгенде ақпай қалған сулар құбырда қатып қалғанын айтты.

«Сондықтан жылу беру кезінде батареялар жарыла бастады. Яғни, жылу үйлерге жеткізілді, жылу желілеріне қатысты мәселелер шешілді. Ендігі мәселе тұрғын үйлердің ішінде. Қазір оқиға орнында жүргендер батареяларды, крандарды, ішкі жылыту жүйелерін ауыстыруға бар күшін салып жатыр. Сондықтан бұл мәселе алдағы екі күнде шешіледі деп ойлаймын», - деді С. Жұманғарин Үкіметте тілшілерге берген сұхбатында.

Серік Жұманғариннің айтуынша, Екібастұзда Премьер-Министрдің бірінші орынбасары Роман Скляр, Энергетика вице-министрі Жандос Нұрмағанбетов, «Орталық Азия энергетикалық корпорациясы» АҚ (ОАЭК) құрылтайшыларының бірі жүр.

«Алдымен мәселені толық шешіп, жылуды барлық пәтерге жеткізу керек, батареяларды жөндеу керек. Содан кейін ғана кінәлілер аталады, кінәлілер өкінеді деп ойлаймын», - дейді вице-премьер.

Бұған дейін Серік Жұманғарин Александр Клебановтың Екібастұз ЖЭО-сын мемлекетке бір теңгеге сатуға дайындығы туралы пікір білдірген еді.