Almaty Business—2021 оқыту және акселерациялау жобасына 1 мыңнан астам кәсіпкер қатысады

Almaty Business—2021 оқыту және акселерациялау жобасына 1 мыңнан астам кәсіпкер қатысады
www.inform.kz

Жоба кәсіпкерлікті дамытудың өңірлік бағдарламасы шеңберінде іске аспақ.

Алматыда Almaty Business-2021 оқыту және акселерациялау бойынша тегін жоба басталды, деп хабарлады Almaty-akshamy.kz.

Аталмыш бағдарлама 7 салалық бағытта, оның ішінде қызмет көрсету және өнеркәсіптің жекелеген түрлері саласында жұмыс істейтін 1 мыңнан астам кәсіпкерді қамтиды және осы жылдың соңына дейін жүзеге аспақ. Бүгінгі таңда 700-ге жуық қатысушы акселераторға қатысуға өтінім берді, 540-тан астам кәсіпорынның жалпы білім алушыларының 4 легі іске қосылды, олардың 100-ге жуығы акселерацияны сәтті аяқтады.

Акселерация бағдарламасы ШОБ үшін өз бизнесін сарапшының көзімен көруге мүмкіндік береді: бизнестің әлсіз тұстарын анықтауға, өзінің даму жоспарын құруға және сату мен пайданы ұлғайтуға қатысты кеңестер айтылады. Сарапшылармен жұмыс істеген 8 апта ішінде кәсіпкер тәлімгерлік және сараптамалық қолдау арқылы өсу мүмкіндіктері мен тиімділікті арттыру жолдарын табады.

Акселераторды өткізу кезеңінде «Цифрлы құралдар және бизнесті автоматтандыру», «Интернет-дамыту», «Кайдзен кәсіпорындарда немен пайдалы болуы мүмкін» және басқа да тақырыптар қозғалады. Акселератор аясында бизнес жүргізудің мүмкіндіктері, құралдары мен ерекшеліктері туралы «Қазэкспо» компаниясының және ZIBRO брендінің бас директоры Елена Свечникова, іскерлік әкімшілендіру магистрі, психолог, бизнес-кеңесші Сергей Каминский, бизнес-жаттықтырушы, коуч Екатерина Колмыкова, сұлулық саласының бизнес-жаттықтырушысы Замира Де Клер, Lanzhou жылдам тамақтану мейрамханалары желісінің иесі Гүлбану Майгарина сынды белді кәсіпкерлер өз ойын ортаға салады.

Кәсіпкерлер мен өзін-өзі жұмыспен қамтығандарды оқытуға, ақпараттандыруға және қолдауға арналған білім беру платформасы 2020 жылы құрылды. Кәсіпкерлік субъектілерін оқыту жөніндегі жобалар Almaty Business-2025 кәсіпкерлікті дамытудың өңірлік бағдарламасы шеңберінде іске аспақ.