Алматылық студент өзі оқитын колледжге төрт рет «бомба қойды»
Студент жарылғыш құрылғы жасырылғаны туралы төрт рет жалған хабарлама жасаған.
Алматылық студент колледжде сабақ болдырмау үшін бомба туралы жалған хабарламалар таратқан, - деп хабарлайды Аlmaty-akshamy.kz Рolisia.kz сілтеме жасап.
Тәртіп сақшыларының айтуынша, жігіт төрт рет - 27, 28 ақпан және 2 наурызда таңертең елді дүрліктірген хабарлама жіберген.
«Алматыда экстремизмге қарсы іс-қимыл бөлімшесінің қызметкерлері Жүргенов атындағы Өнер академиясы колледжінің кәмелетке толмаған студентін анықтап ұстады. Ол оқу орнында жарылғыш құрылғы жасырылғаны туралы бірнеше рет жалған хабарлама жасады деген күдікке ілінді.
Ұсталғаннан кейін және алынған дәлелдемелерді ұсынғаннан кейін ол оқу үлгеріміне байланысты оқу процесін тоқтату үшін осы қылмысты жасағанын мойындады. Бұл дерек Қазақстан Республикасы Қылмыстық кодексінің 273-бабы бойынша тіркелді. ІІМ терроризм актісі туралы көрінеу жалған хабарлағаны үшін бес жылға дейінгі мерзімге бас бостандығынан айыру жазасы қарастырылғанын ескертеді. Мұндай қылмыстардың басым көпшілігі кезекші тәулікте ашылады», – деді ІІМ экстремизмге қарсы іс-қимыл департаменті бастығының орынбасары Дархан Разуев.
Бұл қылмыс үшін 14 жастан бастап қылмыстық жауапкершілік көзделген. Сонымен қатар, сот шешімі негізінде шығындар мен осындай хабарламадан келтірілген барлық залал өтелуге тиіс.
Егер мұндай әрекеттерді кәмелетке толмағандар жасаған жағдайда залалды өтеу олардың ата-аналарына немесе заңды өкілдеріне жүктеледі.
Барлық күштің бір шығуына 200-ден 300 мың теңгеге дейін жұмсалады, ал кәсіпорындар мен сауда объектілерінің тоқтап қалуынан келтірілген залал миллиондаған теңгемен есептелуі мүмкін.
Мәселен, қылмыстық істерді тергеу барысында мемлекетке осындай жалған хабарламалармен келтірілген материалдық шығын жыл сайын 500 мыңнан 2 миллион теңгеге дейін екені анықталды.
