Бүгінгі бәсекеге қабілетті жас ұрпақ өмірімізге еркін енген ақпараттық технологияларды да әбден меңгеріп алды. Содан болар, өркениеттің төл туындысы, IT саласына қызығушылық танытпайтын жас кемде-кем. Сондай талантты жастың бірі – Алматыдағы №17 мектеп-интернатының 7-сынып оқушысы Айнұр Елмұратқызы Астана қаласында өткен Web Xakaton форматындағы IT олимпиадасына қатысып, 1-орынды жеңіп алды.
Жас таланттардың қиялы ұшқыр
Web Xakaton олимпиадасы екі кезеңді қамтыды. Алдымен қатысушылар онлайн, сосын офлайн форматта сайысқа түсті. Байқауға қатысушылар Астана қаласында бас қосып, 450-ден астам веб-сайт әзірлеушілер мен веб-дизайнерлер IT саласы бойынша бақ сынады. Жас ізденушілердің жіберген жұмыстары 4 номинация бойынша іріктеліп, ең үздік 40 бала финалға жолдама алады. Олар жас ерекшеліктеріне қарай «Салауатты өмір салты», «Қалдықсыз өмір» тақырыбында сайт жасап жарысты. Байқауға төрелік жасаған әділқазылардың айтуынша, жас өнертапқыштардың жұмыстары кәсіби маманның жұмысына пара-пар. «Жас таланттардың қиялы ұшқыр, ғылыми жобалары күрделі», – деп жоғары баға берді. Олардың жобаларының біразына қазірдің өзінде сұраныс түсіп жатқан көрінеді.
Сонымен, осынау додаға қатысып, Алматы қаласының намысын қорғаған Айнұр Елмұратқызының болашағынан зор үміт күтуге болады. Ол қазірдің өзінде IT саласын терең зерттеп, өзінің ғылыми жобасын әзірлеу үстінде.
– Астана қаласына ғылыми жетекшім Гүлзат Балғымбаева апайым екеуміз бардық. Жалпы, Web Xakaton байқауына біздің сыныптан мен ғана қатыстым. Алдымен онлайн қатысып көріп едім. Жобаларым жоғары баға алды. Астанадан шақырту келгенде қатты қуандым әрі қатты толқыдым. Бізге жас ерекшеліктерімізге қарай тапсырмалар берілді. Маған «Қаржылық сауаттылық» тақырыбына веб сайт жасап шығу тапсырылды. Өз жұмысыма мобильді қосымшалар жасауға арналған бағдарламаларды қолдандым. Әділқазылар алдына шығып, өз жобамды қорғап шықтым. Болашақта осы IT саласының маманы болсам деймін. Дәлірегі, бағдарламашы болам деп шештім. Бұл салада көбі ағылшын тілінде болғандықтан, арнайы курсқа барып жүрмін. Отбасымызда бес баламыз. Ата-анам менің жеңісіме қуанып, қолдау білдіріп жатыр. Мектепте салтанатты жиын болып, мені директорымыз Айнұр Ерұланқызы барлық ұжым атынан құттықтады.
Дарынды бала дара шықты
Осы мектептің тағы бір мақтанышы – Шыңғыс Асхатұлы жас дарындарды қолдау мақсатында өткізілген республикалық «Жас IT дарын» байқауына қатысып, жеңімпаз атанды.
ҚР Ішкі істер министрлігінің қолдауымен Мақан Есболатов атындағы Алматы академиясында өткен бұл байқауда Шыңғыстың «Кибер қауіпсіздік» деп аталатын ғылыми зерттеу жұмысы ең үздік деп танылды. Жалпы, аталмыш байқауға 300 жас өнертапқыш қатысса, олардың тек 30-ы ғана финалға өтті.
– Мен болашақта IT саласының кибер қауіпсіздігін терең зерттесем деймін. Өйткені, бұл қазіргі таңдағы ең өзекті мәселе. Осы байқауға қатысуыма ғылыми жетекшім Назым Сәтбаеваның еңбегі өте зор болды, – дейді дарынды жас.