Бұл жұмыстарға 467 арнайы техника мен 1094 жұмысшы жұмылдырылды.
9 желтоқсан күні таңертеңнен бастап қалада қар жауа бастады. Синоптиктердің болжамы бойынша, кешке дейін осындай ауа райы сақталады. Көктайғақтың алдын алу мақсатында 134 құмшашқыштың күшімен жолдарға көктайғаққа қарсы материалдар себіліп жатыр. Сағат 10:00-дегі жағдай бойынша 152 тонна материал пайдаланылды, деп хабарлайды Almaty-akshamy.kz.
«Тротуарларды, қоғамдық көлік аялдамаларын, жер үсті және жерасты өткелдерін тазалау жұмыстары жүргізілуде. Аталған жұмыстарға 467 арнайы техника мен 1094 жұмысшы жұмылдырылды», - делінген Коммуналдық инфрақұрылымды дамыту басқармасының хабарламасында.
Аудандық әкімдіктер мен мердігер ұйымдарда жұмыстарды жүргізу бойынша тәулік бойы кезекшілік ұйымдастырылды.
«Қазгидромет» РМК болжамына сәйкес, 9 желтоқсан кешке дейін қар жауып, ауа температурасы күндіз минус 6, түнде минус 8-10 градусқа дейін төмендейді. 10-12 желтоқсан аралығында күн ашық болады.
